Phrâo anai, Jơnum tal 4, rơwang thun 2023-2028 mơng Khul nai ia jrao hlăk ai tơring čar Dak Lak pơsit tong hơnong pơkă phun anun lĕ: Tŏ tui hơdôm bruă djru yua tơlơi suaih pral kơ abih bang mơnuih; pơtrut kơtang bruă mă mơng Khul nai ia jrao hlăk ai ƀơi hơdôm boh ƀon lan. Hăng tơlơi pơsit bruă mă “Nai ia jrao hlăk ai Dak Lak ngă tui tơlơi pơtô mơng wa Hô, djru bruă yua kơ tơlơi suaih pral kơ abih bang mơnuih”, Amăng rơwang mă bruă phrâo, Khul nai ia jrao tơring čar Dak Lak tŏ tui tơlơi gơgrong hăng bruă mă mơng Khul hluai tui hơdôm jơlan hơdră hrăm, pơtô pơjuăt, hrưn đĭ amăng tơlơi pơmĭn, bruă mă; ngă tui pran thâo pơčeh phrâo amăng kơsem minh boh thâo hăng pơtrut kơtang amăng bruă gum djru yua tơlơi suaih pral kơ abih bang mơnuih. Ơi ia jrao Phan Thành Trinh, Khua khul nai ia jrao hlăk ai tơring čar Dak Lak brơi thâo:

“Khul nai ia jrao hlăk ai Dak Lak tŏ ngă tui hơdôm boh tơhnal amăng bruă mă mơng gơñu hăng 3 boh tơhnal phun, lu hloh đing nao hơdôm bruă mă mơng nai ia jrao hlăk ai yua kơ tơlơi hơdip kơ abih bang mơnuih; ngă tui pran gơgrong ba jơlan hlâo mơng ƀing gơñu ƀơi rĭm boh ƀon lan, amăng kual. Hăng pran gơgrong mơng khul nai ia jrao hlăk ai ƀơi hơdôm boh tơring glông pơ anăp anai amra prong kơtang, ƀing adơi ayong amra ngă tui pran gơgrong mơng ƀing gơñu amăng ƀon lan gơñu wai lăng”.

Khul nai ia jrao hlăk ai tơring čar Dak Lak ră anai hơmâo 16 grup anet prong hăng giăm 1.000 čô lĕ nai ia jrao dŏ hlăk ai glăk mă bruă ƀơi hơdôm boh sang ia jrao, anih anom ia jrao mơng tơring čar truh pơ tơring glông hăng hơdôm boh sang ia jrao pơdong mă hơjăn amăng tơring čar. Amăng 5 thun laih rơgao, djop gưl nai ia jrao hlăk ai amăng tơring čar hơmâo lu bruă mă djru khăm pơjrao brơi abih bang mơnuih hăng pơphun 120 tal khăm, črâo brơi, ƀơk jrao soh sel brơi 86.000 čô mơnuih hăng abih tih rơbêh 4,2 klai prăk; pơtop hrăm brơi lu hơdră pơjrao brơi tañ kơ hơdôm rơbâo čô nai pơtô ƀơi hơdôm boh sang hră čơđai anet, sang hră gưl I đơ đam tơring čar. Pơphun hrơi rao tơngan hăng ia kơƀô; pơtô hrăm brơi bruă pơtô pơblang brơi tơlơi suaih pral kơ ƀing hlăk ai thun glăk truh, pơgang tơlơi duam ruă brơi hơdôm rơbâo čô čơđai sang hră. Pok pơhai jơlan hơdră djru brơi mơnuih duam ruă ƀơi 14 boh sang ia jrao đơ đam tơring čar. Hrŏm hăng anun, Khul ăt pơphun črâo brơi tơlơi suaih pral hăng ƀơk jrao soh sel brơi mơnuih ƀôn sang, jao rơdêh dang wang brơi čơđai sang hră tơnap tap.

Rơnuč thun 2023, laih rơgao, ƀơi plơi prong jưh jom Hà Nội, Khul nai ia jrao hlăk ai Việt Nam pơphun jơlan hơdră “Pơplih yua boh thâo phrâo yua kơ tơlơi suaih pral” khăm brơi ƀing ruă bơbrah kơsô̆ hăng tơlơi ruă bơdjơ̆ nao kơsô̆. Hăng lu bruă khăm brơi, phin X-quang, pơčrang lăng, pơkă lăng suă jua, ĕp lăng kơtăk drah, pơčrang lăng ruă ia mơañă ƀlĕ sik, mơmuă amăng kơtăk drah…hơmâo mơnuih ƀôn sang lăng yôm, sa čô mơnuih ruă brơi thâo.

“Kâo pơkă lăng ară drah hăng mă drah pơčrang lăng, bơ ră anai dŏ tơguăn phin kơsô̆, pơčrang lăng dong, kâo dong yua biă mă kơ jơlan hơdră anai. Bơni kơ Kơnuk kơna hơmâo đing nao mơnuih ƀôn sang”.

Anai lĕ jơlan hơdră khăm pơjrao brơi soh sel hmao tlôn ƀing mơnuih amuñ ruă bơbrah kơsô̆ hăng tơlơi ruă hŭi rơhyưt bơdjơ̆ nao kơsô̆, djru pơgang brơi tơlơi suaih pral  hăng hmao tlôn pơjrao brơi, plai ƀiă ba truh tơlơi djai brŭ, bơdjơ̆ nao hơdôm anih amăng drơi jăn, pơgôp pơhlôm tơlơi hơdip mơda, hrưn đĭ klă dong tơlơi hơdip kơ mơnuih ƀôn sang Việt Nam. Ơi ia jrao Hà Anh Đức, Khua anom bruă, Ding jum ia jrao, Khua khul nai ia jrao hlăk ai Việt Nam brơi thâo:

“Bruă pơčrang lăng tañ hloh amra pơjrao brơi hmao tlôn, hăng amra djru brơi mơnuih ruă hơdip sui ƀiă dong, tơlơi hơdip hrưn đĭ klă dong hăng ăt djru plai ƀiă hrŏ prăk kak mơ̆ mơnuih mơnam kiăng glăm ba. Khul nai ia jrao hlăk ai ƀing gơmơi čang rơmang ba nao pơ anun kiăng hơdôm tơlơi prap lui, djru brơi kiăng plai ƀiă prăk duh, tŭ yua hloh, mơnuih ruă dưi tŭ mă hăng ƀing nai ia jrao ăt ngă djơ̆ tơlơi pơkă, tañ ƀuh djơ̆ tơlơi ruă kiăng ba nao pơjrao hmao tlôn”.

Jơlan hơdră “Pơplih yua boh thâo phrâo yua tơlơi ruă kơsô̆” khăm brơi ƀing ruă bơbrah kơsô̆ ƀơi 5 boh tơring čar, ƀôn prong amăng thun 2023 hăng 2024. Jơlan hơdră ba tơbiă hơnong pơkă khăm brơi soh sel kơ ƀing ruă bơbrah kơsô̆ hăng hơdôm tơlơi ruă bơdjơ̆ nao kơsô̆ pơkŏn brơi rơbêh 50.000 čô mơnuih. Hlâo anun jơlan hơdră hơmâo pok pơhai ƀơi ƀôn prong Hồ Chí Minh, ră anai jơlan hơdră tŏ tui pok pơhai ƀơi ƀôn prong Hà Nội, Cần Thơ, Đà Nẵng hăng Thừa Thiên Huế, hăng tơlơi mut hrŏm mơng 1.000 čô nai ia jrao.