VOV4.Jarai-Tui hăng anom bruă khul ia jrao rŏng lŏn tơnah, djup hot yơh phun ñu ngă kơ rơbêh 8 klăk čô mơnuih djai amăng rŏng lŏn tơnah rĭm thun. Amăng anun rơbêh 7 klăk čô mơnuih djai yua djup hot. Djup hot kiăo tui hăng hrip djơ̆ asăp hot arăng djup rĭm thun hơmâo 1 klăk 200 rơbâo čô mơnuih djai yua. Djup hot ăt jing sa tơlơi ngă kơtang, lu mrô mơnuih hơmâo tơlơi ruă jơlan suă jua laih anun ba truh tơlơi ruă ƀu thâo pơjrao amăng jơlan suă jua.

Tui hăng tơlơi pơtong lăng mơ̆ng ƀing ơi ia jrao dưi hơmâo WHO jak iâu lơ 29/4/2020 kiăng tơña lăng brơi ƀuh hơdôm mơnuih djup hot hơmâo tơlơi ruă kơtang, jai kraih kơtang hloh sit ƀă Covid 19, lu hloh kơ mơnuih huăi djup hot. Hrom hăng anŏ pơglăi kơ tơlơi suaih pral, djup hot dŏ ngă huač prăk bơwih ƀong huă mơ̆ng djop mơnuih, djop sang anŏ hăng mơnuih mơnam, ngă răm ƀăm huač prăk yua blơi hot djup, huač prăk ĕp lăng tơlơi ruă hăng pơjrao tơlơi ruă pơdjơ̆ nao mơ̆ng djup hot, ngă rơngiă pran jua mă bruă, rơngiă hrơi mông yua duăm ruă laih anun djai tañ. Tui hăng tơlơi jŭ yap mơ̆ng anom bruă khul ơi ia jrao rŏng lŏn tơnah, rơngiă rơngiom kơ bơwih ƀong huă rŏng lŏn tơnah rĭm thun truh kơ 1.400 klai dolar.

Kiăng pôr pơthâo brơi kơ mơnuih ƀôn sang thâo tơlơi sat pơglăi mơ̆ng djup hot ngă kơ anih dŏ jum dar, Anom bruă khul ơi ia jrao rŏng lŏn tơnah ruah mă tơlơi pơthâo anăn “Hot lĕ sa tơlơi pơhŭi sat kơ ayuh hyiăng anih dŏ jum dar ƀing ta” ngă akŏ kơ Hrơi Rŏng lŏn tơnah ƀu djup hot lơ 31/5/2022. Tơlơi pơthâo anai, Anom bruă khul ơi ia jrao rŏng lŏn tơnah iâu pơthưr djop dêh čar pơtrut bruă mă kiăng mơnuih ƀôn sang thâo hluh lu hloh anŏ pơglăi mơ̆ng djup hot bơbeč djơ̆ kơ anih dŏ jum dar, ƀu djup hot lĕ ngă plai ƀiă ngă hơƀak jrak ayuh hyiăng hăng pran jua ană mơnuih.

Ƀơi Việt Nam, mrô mơnuih djup hot hrŏ tui mơ̆n mơ̆ng 22,5% thun 2015, dŏ glăi 21,7% thun 2020. Mrô đah rơkơi djup hot hrŏ mơ̆ng 45,3% thun 2015 trun dŏ 42,3% thun 2020. Biă mă ñu mrô mơnuih djup hot kiăo tui đôč hrŏ lu biă mă kah hăng anih mă bruă, amăng sang ia jrao, sang hră, anih pơtô hrăm, amăng rơdêh pơgiăng tuai hăng amăng sang anŏ. Tui hăng boh tơhnal sem lăng tơlơi suaih pral čơđai sang hră amăng rŏng lŏn tơnah ƀơi Việt Nam yua Anom bruă khul ơi ia jrao rŏng lŏn tơnah ngă thun 2019, mrô mơnuih djup hot amăng čơđai sang hră mơ̆ng 13-17 thun hrŏ trun mơ̆ng 5,36% thun 2013 trun dŏ 2,78% amăng thun 2019, anai lĕ boh tơhnal lăp bơni biă mă amăng bruă pơgăn tơlơi djup hot amăng ƀing tơdăm ngek dra muai.

Ngă tui Hrơi rŏng lŏn tơnah ƀu djup hot lơ 31/5/2022, sa rơwang hrơi tơjuh dêh čar ƀu djup hot mơ̆ng lơ 25 truh lơ 31/5, Ding jum ia jrao hơmâo hră rơkâo Jơnum min mơnuih ƀôn sang djop tơring čar, ƀôn prong ngă hrom hăng git gai djop sang bruă amăng tơring čar pơtrut lu bruă mă kah hăng: Kơtưn pơtô pơblang tơlơi sat pơglăi djup hot hăng Tơlơi phiăn pơhlôm, pơgang tơlơi sat djup hot; kơtưn ngă hrom djop sang bruă pơgăn djup hot; brơi hyu sem lăng, krăo lăng bruă ngă tui Tơlơi phiăn pơhlôm, pơgang anŏ pơglăi sat mơ̆ng djup hot amăng tơring čar, plơi pla.

Nay Jek: Pơblang