VOV4.Jarai-Tơdơi kơ Ding jum Ia jrao hơmâo hră tŭ ư brơi mă yua, djop mơta ia jrao pơjrao Covid 19, kah hăng djuai ia jrao Molnupiravir dưi ba sĭ mơdrô amăng anih sĭ mơdrô laih. Samơ̆, tui hăng tơlơi pơtă pơtăn hlâo, bruă mă yua ia jrao pơjrao Covid 19 khom yua ơi ia jrao pơčrâo brơi, čih brơi anăn ia jrao mơñum pơjrao, tơdah hyu blơi mă hơjăn hăng pơjrao mă ta pô hŭi biă mă ba truh tơlơi sat ƀu thâo hlâo ôh. Kiăng thâo hluh tong ten hloh kơ tơlơi anai, grup čih tơlơi pơhing kơ Črăn hơdră anai, hơmâo bưp hăng tơña kơ ơi ia jrao Lại Quang Miễn, Kơ-iăng Khua anom bruă ia jrao plơi prong Ƀuôn Ma Thuôt, kiăng rơđah hloh.

-Ơ ơi ia jrao, ih dưi mơ̆n brơi thâo ƀing F0 pơpă dưi mă yua ia jrao Molnupiravil pioh pơjrao ?

-Ơi ia jrao Lại Quang Miễn: Tơdơi kơ Jơnum min mơnuih ƀôn sang tơring čar Dak Lak brơi pơjrao hăng ia jrao Molnupiravir kơ mơnuih F0 pơ sang truh lơ 19/1/2022 Anom bruă ia jrao plơi prong hơmâo dăp hơdră pioh pơjrao kơ mơnuih duăm ruă ƀă kman klin covid dŏ pơjrao pơ sang, ƀing duăm samơ̆ ƀu mưn ôh ƀudah mưn mơ̆n djong. Kơ hơdră pơjrao, mơta sa, ia jrao pơjrao kơ đah rơkơi, đah kơmơi mơ̆ng 18 thun pơngŏ kah dưi. Ƀu pơjrao kơ mơnuih gah yŭ 18 thun ôh. Đah kơmơi pi kian ƀudah ƀing đah kơmơi hlăk brơi ană nge mem ăt ƀu dưi pơjrao lơi. Ƀing hơmâo tơlơi ruă ƀu thâo pơjrao sui laih, ăt kŏn pơjrao hăng ia jrao anai lơi. Hơdôm mơnuih tha rơma, hơmâo tơlơi ruă mơ̆ng hlâo laih, kah hăng ruă hơtai boh, ruă hơtai, ƀudah ruă boh ƀleh sui laih ăt ƀu dưi pơjrao hăng ia jrao Molnupiravir ôh.

-Bơ mơnuih ƀôn sang hyu ĕp blơi mă ia jrao Molnupiravir pioh pơjrao Covid 19 anŏ pơglăi sat ñu hiư̆m pă ?

-Ơi ia jrao Lại Quang Miễn: Tơdah mơnuih ƀôn sang hyu ĕp blơi mă ia jrao pơjrao virus anai lĕ hŭi biă mă yua dah ia jrao pơjrao virus anai hăng anăn ia jrao Molnupiravir ñu pơglăi hăng hơdôm ƀing hơmâo tơlơi ruă. Tơdah ƀu dưi yua ôh lĕ, ăt mă yua ia jrao anai sit mơ̆n ƀu thâo hlao ôh duăm, tăp năng kraih tui dơ̆ng. Bruă pơjrao arăng sem laih, kman anai ba tơlơi ruă ƀă hyu djuai A, tơlơi ruă hŭi rơhyưt biă mă anun yơh sit mă yua ia jrao pơjrao khom hơmâo tơlơi pơčrâo brơi, čih pơtă mơ̆ng ơi ia jrao. Hyu ĕp blơi mă ta pô hŭi biă mă.

Yap truh ră anai, Anom bruă ia jrao pơjrao F0 pơ sang năng ai 18 rơbâo čô mơnuih, amăng anun hlao lĕ 7.638 čô, hlăk dŏ pơjrao 10 rơbâo 415 čô hăng ba nao pơ sang ia jrao prong hloh lĕ 43 čô. Kơnong ƀing F0 pơjrao pơ sang lĕ hơmâo yua ia jrao pơkơdong glăi virus djuai ia jrao Molnupiravir lĕ gơmơi pơjrao brơi kơ 670 čô. Boh tơhnal pơjrao tŭ yua biă mă, aka ƀu hơmâo ôh pô gơmơi pơjrao tơlơi ruă kơtang tui ƀudah djai. Abih bang ƀing pơjrao hăng ia jrao anai lêng kơ hơđong soh.

-Tui anun, ơi ia jrao hơmâo tơlơi pơtô hơgĕt mơ̆n kơ mơnuih ƀă Covid 19 ?

-Ơi ia jrao Lại Quang Miễn: Ră anai, Ding jum ia jrao pơtă pơtăn abih bang mơnuih ƀôn sang ƀă Covid 19 khom hơđong pran jua, anăm bơngơ̆t ôh, kŏn hŭi đơi lơi. Ră anai, gơmơi akŏ pơjing 25 grup ơi ia jrao, nai ia jrao hyu pơjrao tơl sang. Ƀing nai ia jrao pơ sang ia jrao să, phường hơmâo hrăm kơ hơdră pơjrao ƀing F0 laih soh, tơdah pơjrao pơ sang ƀudah đuăi hyu pơjrao laih anun mă yua ia jrao pơjrao ƀing F0 hăng ia jrao pơkơdong glăi kman. Yua kơ anun, lơ̆m ƀă klin, mơnuih ƀă klin ƀudah mơnuih amăng sang anŏ nao lăi pơthâo pơ sang ia jrao să, phường.

Tơdah sang anŏ hơmâo djop tơlơi gêh găl, sang ia jrao ngă hră brơi pơjrao pơ sang. Laih hơmâo hră pơtrun pơjrao mơnuih ruă F0 pơ sang lĕ, mơnuih mă bruă mơ̆ng sang ia jrao pơhiăp hrom na nao, tơña bla, pơtô brơi hơdră pơjrao mă pơ sang, kah hăng: pơkă mă tơnŏk, ayuh pơiă amăng drơi jăn, kiăng thâo krăn sa hrơi dua wơ̆t tlam hăng mơguah pioh lăi pơthâo hăng ơi ia jrao. Tơdah mơnuih ruă jai kraih, kơtang tui ƀing ơi ia jrao să amra nao pơ sang ĕp lăng ƀudah pơtô brơi hơdră pơjrao hăng brơi ba nao pô ruă pơ sang ia jrao prong pơjrao tong ten.

-Hnun hă, bơni kơ ih ơi ia jrao hŏ!

Nay Jek: Pơblang