Năng ai ñu 2 rơwang hrơi tơjuh hlâo, čơđai 19 blan, dô̆ ƀơi tơring glông Hải Lăng, tơring čar Quảng trị pơphun hmâo tơlơi ruă hăng gru nam bơbrah ruă kual tơngia gah iao, ba nao pơ̆ sang ia jrao ƀơi anih pơjrao tơngia – adung – rơkông đok, Sang ia jrao Huế dêh čar ta pioh pơjrao. Tơdơi kơ anun, pô ruă dưi pơčrang lăng, tơbiă rai kơman ngă ruă Whitmore anun dưi ba nao pơ̆ Anom pơjrao tơlơi ruă čơđai muai. Tơdơi kơ 2 rơwang hrơi tơjuh pơjrao hăng jrao kinin ƀơi ară drah, čơđai hơđong laih tơlơi suaih pral, nam rơka ƀơi tơngia krô hăng dưi tơbiă mơ̆ng sang ia jrao, pơjrao pơ̆ sang hăng jrao kinin amăng ƀiă biă ñu 3 blan. Hmâo mơnuih ruă Whitmore krăih hloh lĕ čơđai Trịnh Ngọc N., 6 blan, dô̆ ƀơi tơring glông Cam Lộ, tơring čar Quảng Trị. Ñu pơphun hmâo tơlơi ruă hlâo kơ ba nao pơ̆ sang ia jrao 5 hrơi hăng pơ-iă drơi jăn na nao, čroh kian nao juă glai mơ̆ng 6-7 wot sa hrơi nao hrŏm hăng suă pran tañ, tơnap suă jua. Lơm dưi pơkă lăng hmâo kơman ngă ruă Whitmore, ƀing ơi, nai ia jrao Anom pơjrao tơlơi ruă čơđai muai hmâo pơphun pơjrao hăng jrao kinin klă kơ čơđai. Yă Lê Thị Gái, yă pô ruă Trịnh Ngọc N. brơi thâo:

 “Ñu dơnong kơ pơ-iă drơi jăn 39 truh 40 đô̆ na nao lăi hrŏm lĕ pơdơi truh hrơi tal 3 mă ƀiă ñu kơañăk, tơdơi kơ kơnang amăng sang ia jrao ba ñu rai pơ̆ Sang ia jrao dêh čar, lơm anun ba nao pơ̆ sang ia jrao pơjrao ječ mơtăm”.

Tơlơi ruă Whitmore biă ñu lar tưp tui jơlan klĭ ƀudah tui gơnam ƀong, ia mơñum hmâo kơman. Tơlơi ruă juăt hmâo amăng hơdôm hrơi kơthel ia ling dăo ngă, ƀơi anih ƀu hơdjă. Pô ruă khom dưi pơjrao hăng ia jrao kinin sui hrơi, juăt ñu lĕ jrao ia jrao ia mơ̆ng 2-4 rơwang hrơi tơjuh. Tơdah ƀuh plai ƀiă, tơlơi ruă amra pơjrao pơ̆ sang hăng jrao kinin tui jơlan mơñum ƀiă biă ñu 3 blan. Thạc sĩ, ơi ia jrao Trần Thị Hạnh Chân, mă bruă ƀơi Anom pơjrao tơlơi ruă čơđai muai, Sang ia jrao Huế dêh čar ta brơi thâo:

  “Tơlơi ruă Whitmore lar tưp biă ñu tui jơlan klĭ ƀudah tui gơnam ƀong ia mơñum hmâo kơnam, yua anun hmâo sa bruă mă lĕ kơnong kơ agaih rơnăk. Yua kơ lu mơnuih lơm ta ƀu thâo kơman hơget ôh, kơnong kơ pơčrang lăng kah mơ̆ng thâo tơlơi ruă Whitmore”.

Ƀơi Sang ia jrao prong Huế dêh čar ta, tui tơlơi jŭ yap rơwang mơ̆ng 2014-2019, sang ia jrao hmâo tŭ mă 83 čô mơnuih dưi pơkă lăng Whitmore. Mơ̆ng thun 2024 truh ră anai, Sang ia jrao prong Huế dêh čar ta tŭ mă hăng pơjrao 17 čô mơnuih ruă. Ƀơi Dak Lak hmâo 2 čô mơnuih ruă Whitmore yap mơ̆ng akô̆ thun 2024 truh ră anai. Tui gơnong bruă ia jrao, truh kơ ră anai, tơlơi ruă Whithmore ăt akă hmâo vaccine pơgang hlôm hlâo mơn. Bruă pơgang hlôm hlâo biă ñu bĕ juă tơkai soh ƀơi lŏn hăng ia hlŭ djơ̆ kơman, biă ñu hơdôm mơnuih hmâo tơlơi ruă lok nao lok rai mơ̆ng hlâo kah hăng ruă pơđoh ia sik, tơlơi ruă hơtai lok nao lok rai... Tơdah ƀu bưng hmâo nam rơka, bĕ nam rơka djơ̆ lŏn ƀudah ia hlŭ lơm akă grăng abih bang. Ƀu ƀong gơnam ƀong ƀudah ia mơñum akă rơgao pơsir amra djơ̆ kơman. Lơm tơbiă gah rơngiao, khom djă ba bơnal gôm adung mơbah pơgang jơlan suă jua, biă ñu amăng anih anom hmâo lu ƀui hlŭ. Lơm hmâo tơlơi ƀu mơ-ak amăng drơi jăn, anăm pơjrao mă pô ôh, tâ̆o hloh nao pơ̆ sang ia jrao hmư̆ hing klă pioh dưi hmâo ƀing ơi ia jrao lăi pơthâo, pel ĕp lăng, pơkă tơlơi ruă hăng pơjrao hmao tlôn./.