Pơsur mơnuih ƀôn sang pơđĭ tui tơlơi pơmin amăng bruă pơgang, pơgăn klin Covid-19. Gơnang kơ anun, tơlơi Covid-19 ƀơi Daklak dưi wai lăng, neh wa pơwot glăi tơlơi hơdip kah hăng hơđăp. Bruă tơña ơi Hà Huy Quang, Kơ-iăng Khua Grŭp djuai ania tơring čar Daklak ngă rơđah hloh hơdôm bôh tơhnal amăng bruă anai.

-Rơkâo ih brơi thâo hơdôm bruă mă mơ̆ Grŭp djuai ania tơring čar hmâo pok pơhai amăng hơdôm hrơi tơring čar Daklak bŏng glăi hăng Covid-19?

Ơi Hà Huy Quang: “Thun 2020, 2021 ƀơi anăp tơlơi pơplih mơng klin Covid-19 gluh đĭ ƀơi tơring čar, biă ñu hăng hơdôm bôh plơi pla kual neh wa djuai ania ƀiă, thâo kơ tơlơi anun, Grŭp djuai ania tơring čar hmao pơphô brơi Jơnum min mơnuih ƀôn sang tơring čar pơdŏng kơčăo bruă črâo ba ƀirô mă bruă gah djuai ania hơdôm gưl pơtrut kơtang bruă lăi pơhing, pơgang, pơgăn klin Covid-19 amăng kual neh wa djuai ania ƀiă amăng đơ đam tơring čar, biă ñu lĕ hơdôm bôh plơi pla hmâo klin ngă kơtang. Hluai tui bruă lăi pơhing kah hăng pơpha hyu hră lăi pơthâo, pơjing pa nô hăng iâu pơhrui mơnuih ƀôn sang kual neh wa djuai ania ƀiă ngă tui tơpă hơdôm bruă pơgang pơgăn klin ruă Covid-19 tui tơlơi pơtă mơng gơnong bruă ia jrao; gơnang kơ anun klin ruă Covid-19 amăng kual neh wa djuai ania ƀiă amăng ƀrư̆ dưi wai lăng, plai ƀiă răm rai truh tơlơi hơdip mơnuih, ba glăi tơlơi hơdip hơđong kah hăng hlâo kơ akă hmâo klin, đing nao bruă mă ngă đang hmua, pơđĭ kyar bơwih ƀong.

-Ơ ơi, dưi mơn pơtŏng sit, vaccine jing bôh than yôm phăn pioh pơgang pơgăn klin Covid-19. Khă hnun hai, lom klin hơdư̆ hĭ, sa dua čô mơnuih ƀơi Daklak hmâo tơlơi pơmin ƀu đing nao tơlơi anai, Grŭp djuai ania tơring čar hmâo yơh hơdôm jơlan gah pioh lăi pơhing, pơsur mơnuih ƀôn sang nao tlâ̆o vaccine pơgang ơ ơi?

Ơi Hà Huy Quang: Dưi pơtŏng sit mơn, bruă tlâ̆o vaccine pơgang, pơgăn klin Covid-19 jing anô̆ pơgăn tŭ yua hloh amăng bruă pơgăn klin; kah hăng ƀing gơmơi hmâo ƀuh amăng rơwang blung a gơnang kơ hơdră pơtrun djơ̆, hmao tlôn mơng gưl ping gah, gong gai hơdôm gưl, biă ñu bruă “Pơtôm hiăp vaccine” pơplih tañ mơng Ping gah, Gong gai dêh čar ƀing ta hmâo laih sa mrô vaccine lu hmao tlôn pioh tlâ̆o pơgang kơ mơnuih ƀôn sang hơdôm kual phun klin ngă lu, gơnang kơ anun klin ruă amăng ƀrư̆ dưi wai lăng, mrô mơnuih djai yua kơ klin ruă hrŏ trun ƀuh rơđah, tơlơi hơdip mơnuih ƀôn sang ƀơƀrư̆ pơwot glăi kah hăng hlâo adih; mơng anun pơjing tơlơi pơmin amăng mơnuih ƀôn sang, biă ñu amăng kual neh wa djuai ania ƀiă hmâo tơlơi ƀu đing nao, lui raih, ƀu gan ôh hăng bruă tlâ̆o vaccine. Thâo kơ tơlơi anun, hluai tui tơlơi pơtô ba mơng gơnong bruă ia jrao hơdôm gưl, Grŭp djuai ania tơring čar hmâo gơgrong hlâo gum hrom laih hăng Gong phun jua pơhiăp dêh čar Việt Nam dô̆ bruă ƀơi kual Dăp Kơdư hăng Gong phun pơtui jua pơhiăp hăng pơdah rŭp tơring čar Daklak pok pơhai bruă lăi pơhing pơgang, pơgăn klin hăng lu tơlơi pơhiăp, pơtui jua pôr amăng Gong phun pơtui jua pơhiăp mơng tơring čar hăng amăng kual pơtrut kơtang bruă lăi pơhing kiăng pơđĭ tui tơlơi pơmin mơng mơnuih ƀôn sang amăng kual neh wa djuai ania ƀiă thâo rơđah kơ tơlơi tŭ yua, tơhnal yôm phăn mơng bruă tlâ̆o vaccine pơgang Covid-19 amăng pơgang, pơgăn klin Covid-19, pơsur mơnuih ƀôn sang kual neh wa djuai ania ƀiă gum hrom tlâ̆o vaccine pơgang Covid-19 hmao tlôn, tum djop. Rơgao kơ anun, tui tơlơi lăi pơthâo glăi mơng Gơnong bruă ia jrao truh ră anai mrô mơnuih tlâ̆o vaccine pơgang Covid-19 ƀơi rim khul mơnuih ba glăi bôh tŭ yua klă; djru amăng ƀrư̆ pơtrut kơdun glăi klin Covid-19 amăng đơ đam tơring čar.

-Kah hăng ih phrâo lăi pơthâo kơ bruă gum hrom hăng hơdôm bôh ƀirô pôr pơhing kiăng hmâo lu hơdră pôr pơhing pioh pơđĭ tui tơlơi thâo mơng mơnuih ƀôn sang amăng bruă pơgang, pơgăn klin ruă Covid-19, ơi Hà Huy Quang pơsit hiưm hơpă kơ tơlơi lăi glăi mơng mơnuih hmư̆ brô̆ amăng hơdôm hrơi pơ̆ anăp, Grŭp apăn bruă djuai ania tơring čar Daklak amra hmâo hơdôm jơlan hơdră gum hrom hiưm ñu pioh dưi lăi pơhing abih bang hơdôm tơlơi gah hơdră bruă pioh kơ kual neh wa djuai ania ƀiă:

Ơi Hà Huy Quang: “Anun ăt lĕ sa gru nam hăng bôh tơhnal klă amăng bruă lăi pơhing pơgang, pơgăn Covid-19 pioh kơ bruă gum hrom hăng Ƀirô pôr pơhing mơng dêh čar ăt kah hăng tơring čar, ƀôn prong kiăng pơđĭ tui tơlơi thâo, gơgrong bruă mơng mơnuih ƀôn sang amăng bruă pơgang, pơgăn klin. Ngă tui hơdôm bôh tơhnal dưi ngă, bruă lăi pơhing pơgang, pơgăn klin Covid-19 pơ̆ anăp anai khom đing nao sa dua bruă mă rơđah rơđông anun lĕ: Gum hrom gong gai hăng hơdôm ƀirô pôr pơhing kah hăng Gong phun jua pơhiăp dêh čar Việt Nam kual Dăp Kơdư (VOV), Gong phun pơtui jua pơhiăp hăng pơdah rup tơring čar kơtưn mông pôr pơhing na nao, prong dơlăm amăng neh wa djuai ania ƀiă; biă ñu ngă tui bruă mă mơng Mơnuih hmâo arăng đăo gơnang pơtrut kơtang bruă lăi pơhing pơgang, pơgăn klin, djru mơnuih ƀôn sang kual neh wa djuai ania ƀiă thâo djơ̆ bôh tŭ yua, tơhnal yôm phăn mơng vaccine pơgang, pơgăn klin, gơgrong hlâo ngă tui dong hơdôm bruă pơgang hlôm hlâo klin: Bơnal gôm adung mơbah, jrao pơdjai kơman, vaccine, ia jrao, pơjrao, hơdră phrâo hăng hơdôm bruă tui tơlơi pơtô ba mơng ƀirô ia jrao hơdôm gưl; nao hrom hăng bruă pơphun pok pơhai ngă tui klă bruă djuai ania hăng hơdră bruă djuai ania ƀơi tơring čar, biă ñu, pok pơhai ngă tui klă Jơlan hơdră pơkă mơng dêh čar kơ pơđĭ kyar bơwih ƀong – mơnuih mơnam kual neh wa djuai ania ƀiă hăng kual čư̆ siăng rơwang 2021-2030. Djru tañ pơtrut kơdun glăi klin Covid-19, đing nao pơđĭ kyar bơwih ƀong, pơđĭ tui tơlơi hơdip mơda, djă pioh rơnuk rơnua bruă kơđi čar hăng hơđong pơhlôm mơnuih mơnam amăng kual neh wa djuai ania ƀiă; ngă dưm kơñar tui tơlơi hơdip mơda kơplah wah mơnuih ƀôn sang kual djuai ania ƀiă hăng djuai ania yuan, kơplah wah kual plơi pla hăng plơi prong”.

-Hai bơni kơ ih hŏ!