VOV4.Jarai - Tơring čar Daklak glăk pok pơhai dong bruă tlâ̆o vaccine pơgang tơlơi ruă bơbrah rơkông đok tal 3, hăng tơhnal pơkă 95% mrô mơnuih amăng plơi pla dưi tlâ̆o pơgang. Ơi Nay Phi La, Khua Gơnong bruă ia jrao tơring čar Daklak brơi thâo, mrô vaccine pơgang tơlơi ruă bơbrah rơkông đok dưi pha brơi bruă mă tal anai lĕ 743.000 liều.

Mơnuih mă bruă ƀơi Sang ia jrao să Čư̆ Prao, tơring glông Mdrak tlâ̆o vaccine pơgang tơlơi ruă bơbrah rơkông đok kơ mơnuih ƀôn sang

Gơnong bruă črâo ba glông bruă ia jrao pel ĕp glăi, yap glăi mơnuih akă tlâ̆o pơgang ƀơi hơdôm bôh plơi pla, ƀudah hơdôm kual hmâo mơnuih ruă samơ̆ akă tlâ̆o pơgang djop, pơhlôm hơdôm mơnuih dưi tlâ̆o djop 2 ară, djơ̆ tui mrô pơkă 95% ƀơi abih bang hơdôm bôh să, phường, tơring kual, biă ñu kual asuek, ataih, anih tŭ mă bruă bơwih kơ ia jrao ƀu lu. Gơnong bruă ia jrao pơpha hyu djop mrô vaccine, gơnam tam hăng măi mok ăt kah hăng mơnuih apăn bruă, mơnuih mă bruă tlâ̆o pơgang hlôm hlâo klin ruă tui tơlơi pơkă gah bôh thâo bruă mă. Bruă tlâ̆o vaccine pơgang hlôm hlâo tơlơi ruă bơbrah rơkông đok amăng hnưr thun mơng 5 truh kơ 11 thun akă dưi tlâ̆o vaccine pơgang Covid-19 amra ba glăi bôh tơhnal dua mơta amăng pơgang pơgăn klin ruă./.

Siu H’ Prăk: Pơblang