VOV4.Jarai - Mơguah lơ 10/3, Sang ia jrao prong Tâm Anh brơi thâo, jrao pơgang klin kman djuai Evusheld mơng AstraZeneca - djuai pơgang kman pơkra mơng čơđeh drah kơtăk blung a ƀơi rŏng lŏn tơnah pioh pơgang Covid-19 hơmâo Ding jum ia jrao sit nik brơi mă yua ƀơi Việt Nam. Sang ia jrao anai amra ba jrao pơgang djuai Evusheld tlâ̆o kơ ƀing amuñ ƀă klin Covid-19, ruă kơtang. Rơđah biă ñu, jrao pơgang djuai Evusheld mơng AstraZeneca amra tlâ̆o brơi ƀing hơmâo tơlơi ruă kah hăng ruă hơtai, ruă boh ƀleh, ruă hơtai boh, ruă tơlang, ruă mơañă tơbiă ia sik, ruă kơsô̆ ngă kơdol ƀu thâo suaih-COPD....Biă ñu lĕ ƀing tơdu drah kơtăk pơgang glăi tơlơi ruă găp ƀrô hăng kơtang (yua kman HIV, glăk pơjrao ung thư, pơtlep mă mơnong amăng lăm kian pruăi ....) ƀudah ƀing hơmâo tơlơi ruă (lupus pơđeh mriah, ruă bơbrah tơlang, luih tơlang). Phara hăng vaccine, kơnong kơ hơdôm mông tơdơi kơ tlâ̆o Evusheld, drơi jăn hơmâo djŏp mơnong dưi pơgang klin duam ruă pơgang huăi ƀă klin Covid-19 tŭ yua truh 83% laih anun ƀu hơmâo pô ruă kơtang ƀudah djai ôh amăng 6 blan krăp lăng, tui hăng boh than kơsem min PROVENT mơng AstraZeneca.

Siu H’Mai: Pơblang