VOV4.Jarai - Amăng hơdôm thun rơgao, hrŏm hăng tơlơi djru ba mơng Kơnuk kơna, bruă pơkra jơlan plơi pla phrâo ƀơi tơring glông Čư̆ Jut, tơring čar Dak Nông hơmâo ngă ƀơi djop anih. Mơng bruă iâu pơthưr, hơmâo hơdôm rơbâo boh sang anŏ hlong kăng pha lŏn, pơčruh lŏn man pơkra jơlan nao rai amăng plơi, djru pơplih phrâo ƀô̆ adung mơta plơi pla ƀơi tơring glông Čư̆ Jut, tơring čar Dak Nông hrơi pơplih tui.

Pơsit jơlan nao rai amăng plơi lĕ sa amăng hơdôm hơnong pơkă tơnap ngă biă amăng hơdôm hơnong pơkă dêh čar kơ plơi pla phrâo. Yua hnun, pơđĭ kyar jơlan nao rai amăng plơi pla pơlir hrŏm hăng ngă Jơlan hơdră dêh čar man pơdong plơi pla phrâo hơmâo tơring glông Čư̆ Jut, Dak Nông pơsit jing bruă yôm phun. Rim thun, ping gah, gong gai plơi pla pơƀut git gai hơdôm anom bruă, Jơnum min mơnuih ƀon sang să lăng glăi abih bang, čih pơkra akŏ bruă hăng rơkâo pơkra hlâo hơdôm glông jơlan kiăng nao rai hloh.

Kiăng ngă sit mơtăm bruă pơđĭ kyar jơlan nao rai ƀơi anai, rơngiao kơ prăk djru mơng Kơnuk kơna, mơng tơring čar, tơring glông Čư̆ Jut ăt thâo hyu jak iâu, ngă pơhưč prăk tuh pơ alin mơng hơdôm anom bruă, anom bơwih ƀong, tơlơi gum pơgôp mơng mơnuih ƀon sang pioh ngă bruă anai. Yap kơnong amăng rơwang thun 2016-2020, tar ƀar tơring glông Čư̆ Jut hơmâo pơhrui giăm 250 klai prăk pioh akŏ pơdong plơi pla phrâo; amăng anun mơnuih ƀon sang hăng hơdôm anom bơwih ƀong gum djru giăm 44 klai prăk, dŏ glăi lĕ prăk djru mơng Kơnuk kơna.

Mơnuih ƀon sang gum pơkra jơlan nao rai amăng plơi.

Tơring glông hơmâo ngă tui hơdră “mơnuih ƀon sang thâo, mơnuih ƀon sang črông sai, mơnuih ƀon sang ngă hăng mơnuih ƀon sang dŏ lăng”. Tui anun, abih bang bruă bơdjơ̆ nao tơlơi hơdip lêng khŏm lăi pơthâo pơ anăp mơnuih ƀon sang, yua mơnuih ƀon sang amăng plơi, amăng să pơčrông sai kah mơng dưi pơphun ngă. Bơ gong gai kơnong pơtô ba, pơtrun hră pơ-ar hăng hơdră djru kiăng mơnuih ƀon sang ngă tui bruă hrŏm abih bang đôč.

Yua hơmâo tơlơi tŭ ư mơng mơnuih ƀon sang mơn, bruă čuk pơkra lŏn mơng dưi ngă amuñ. Čuk pơkra lŏn dơ̆ hơpă lĕ mơnuih ƀon sang dŏ kơtuai jơlan lêng pơpha brơi lŏn soh, ƀu tơña prăk ôh. Djŏp gưl ping gah, gong gai, hơdôm anom bruă mơng tơring glông truh pơ plơi pla pơsit hơdôm bruă ngă lĕ khŏm djơ̆ hăng tơlơi kiăng, tơlơi čang rơmang mơng mơnuih ƀon sang. Yua hnun, bruă kăng pơpha lŏn pioh ngă jơlan ƀơi hơdôm boh plơi pla hơmâo abih bang mơnuih ƀon sang tŭ ư. Tơdơi kơ giăm 10 thun man pơdong plơi pla phrâo, truh ră anai, tơring glông Čư̆ Jut, Dak Nông hơmâo rơbêh 170 km jơlan nao rai amăng să lĕ jơlan kơsu, jơlan bê tông, dưm dưm hăng 70% mrô jơlan nao rai amăng tơring glông. Ră anai hơmâo 5 amăng 7 boh să mơng tơring glông ngă giong mrô pơkă jơlan nao rai.

Ha bơnah plơi pla rơnuk anai ƀơi să Tâm Thắng, tơring glông Čư̆ Jut.

Truh ră anai, anih tŏng krah să Nam Dong  hơmâo pơsit plơi prong mrô 5; tơring kual Ea T’Ling hơmâo pơsit anăn plơi prong mrô 4. Tar ƀar tơring glông hơmâo 6/7 boh să plơi pla phrâo. Ta dưi lăi tui anai: tơlơi dưi pơđĭ kyar jơlan nao rai pơlir hrŏm hăng man pơdong plơi pla phrâo ƀơi Čư̆ Jut lĕ yua hơmâo abih bang anom bruă čar gum djru, khua mua, mơnuih ping gah hăng abih bang mơnuih ƀon sang gum ngă. Anai lĕ pơkhoă pok brơi tơring glông dưi ngă giong djŏp tơlơi pơtrun mơng Ping gah amăng bruă man pơdong plơi pla phrâo, pơtrut pơđĭ kyar bơwih ƀong huă – mơnuih mơnam.

Ơi Nghiêm Hồng Quang, Khua Jơnum min mơnuih ƀon sang tơring glông Čư̆ Jut, Dak Nông brơi thâo: Kiăng dưi ngă Jơlan hơdră pơđĭ kyar jơlan nao rai rơwang thun 2020-2025, tơring glông ăt jak iâu Kơnuk kơna djru prăk kăk, hơdôm jơlan hơdră dêh čar pơtrun, iâu pơthưr hơdôm anom bruă, mơnuih mơnam gum djru kiăng pơkra hiam hloh hơdôm glông jơlan nao rai amăng tơring glông, pơtruh nao rai hơdôm boh să, pok jơlan phrâo hăng pơkra jơlan hăng bê tông ƀơi hơdôm jơlan ană plơi juăt nao rai, pơkra jơlan pơlir hăng man pơdong plơi pla phrâo. Gir trun thun 2025 jing tơring glông plơi pla phrâo, hơmâo mơng 2 truh pơ 3 boh să plơi pla phrâo klă hloh; să Nam Dong jing tơring kual – plơi prong pơkă mrô 5; tơring kual Ea T’ling pơđĭ kyar tui hơdră plơi prong pơkă mrô 4 truh thun 2030./.

Siu H’Mai: Pơblang