VOV4.Jarai - Aka ƀu thâo tong ten kơ hrơi blan ngă pơgiong tui hơnong pơkă plơi pla phrâo lĕ tơlơi ngă kơ khua mua tơring glông lạc Dương, tơring čar Lâm Đồng dŏ bơngŏt. Samơ̆ kơplah wah 2 mơta tơlơi anun lĕ ngă pơgiong hơnong pơkă djơ̆ hrơi mông pơkă lơ̆m lu mơta bruă akŏ phun aka ƀu hơđong kjăp hăng pơhrua dong hrơi blan pơkra pơjing kiăng kơ djơ̆ hăng tơlơi pơkă, tơring glông hơmâo ruah tui črăn tal 2. Đĭ tui ƀơbrư̆ kiăng kơ pơhlôm hơđong kjăp amăng thun blan man pơdong tơring glông plơi pla phrâo.

Truh rơnuč thun 2020, đơ đam tơring glông Lạc Dương hơmâo 4 boh să hơmâo Jơnum min mơnuih ƀon sang tơring čar Lâm Đồng tŭ yap plơi pla phrâo. Kơnong să Đưng K’Nớ dưi ngă pơgiong 14/19 hơnong pơkă. Amăng bruă man pơkra anih anom bơwih ƀong huă - mơnuih mơnam hơmâo hơdôm ring bruă pioh yua amăng tơlơi hơdip mơda, bơwih ƀong huă kơ mơnuih ƀon sang ƀơi hơdôm să plơi pla phrâo tŏ tui đing nao tuh pơ alin, pơplih bruă bơwih ƀong huă ƀơi ƀon lan, ĕp brơi bruă mă hăng hơmâo lu dong prăk pơhrui kơ mơnuih ƀon sang anai lĕ bruă đing nao biă mă. Hơdôm jơlan hơdră pơhrŏ trun ƀun rin, pơhlôm tơlơi hơdip kơ mơnuih mơnam hơmâo ngă tŭ yua. Yua anun, truh blan 11/2020 tơring glông dŏ 122 boh sang anŏ ƀun rin, giăm 1,8%. Amăng anun, mrô sang anŏ ƀun rin lĕ djuai ania ƀiă dŏ 119 boh sang anŏ, dưm dưm 2,5%. Prăk pơhrui rĭm akŏ mơnuih amăng đơ đam tơring glông thun 2020 him lăng 45 klăk 900 rơbâo prăk.

Pơđĭ kyar tơlơi bơwih ƀong huă, tơlơi hơdip mơnuih ƀon sang hrưn đĭ anai lĕ hơdôm anŏ ba glăi mơng bruă man pơdong plơi pla phrâo ƀơi Lạc Dương

Ră anai bruă man pơdong plơi pla phrâo amăng tơring glông Lạc Dương, tơring čar Lâm Đồng dŏ bưp tơnap tap amăng 3 mơta anun lĕ: ayuh hyiăng, jơlan glông hăng să kual ataih Đưng K’Nớ. Kơ bruă wai pơgang ayuh hyiăng, ơi Hoàng Văn Hãnh - Kơ-iăng khua anom bruă wai pơgang ayuh hyiăng rơhuông adai tơring glông Lạc Dương brơi thâo: 3/5 mơta amăng hơnong pơkă ayuh hyiăng dưi ngă pơgiong ƀơi djop să. Amăng anun bruă pơƀut pơdŭ pơgiăng, kĕ pơrai asuk ruk hăng man pơkra anih dưm get ia jrao pơgang phun pla hơmâo đing nao. Samơ̆, sa, dua boh sang anŏ, mơnuih aka ƀu thâo rơđah kơ tơlơi yôm mơng bruă anai yua anun aka ƀu ngă tui, bơbeč sat nao bruă hrŏm hăng gun hĭ lơ̆m ngă tui hơnong pơkă man pơdong plơi pla phrâo.

Kơ jơlan glông, tơlơi ngă tơnap tap amăng tơring glông Lạc Dương ră anai lĕ ƀơi arăng jơlan glông 7.000 met mơng ƀut plơi 2 nao pơ plơi Đưng Trang gah să Đưng K’Nớ. Ơi Nguyễn Văn Huynh - Khua anom bruă bơwih ƀong huă - man pơdong anih anom tơring glông Lạc Dương brơi thâo: Kiăng kơ pơhlôm să Đưng K’Nớ dưi ngă giong hơnong pơkă jơlan glông pơgôp ngă pơgiong hơnong pơkă amăng man pơdong plơi pla phrâo thun 2021, anom bruă rơkâo Jơnum min mơnuih ƀon sang tơring glông Lạc Dương pơkra ming jơlan glông hăng rơnoh prăk tuh pơ alin giăm 4 klai prăk. Him lăng ring bruă anai amra pơgiong amăng thun 2021.

Tơdah dua mơta bruă phrâo lăi nao dưi pơsir hĭ lơ̆m rơnoh prăk tuh pơ alin pơhlôm amra jing tơlơi ngă gêh gal brơi să Đưng K’Nớ. Kiăng kơ man pơdong plơi pla phrâo amăng thun 2021, bruă tuh pơ alin amăng să Đưng K’Nớ hơmâo hơdôm bruă anun lĕ: jơlan glông, gru grua sô hơđăp, ia hơdjă, dơnao pơkŏng ia hăng biă mă ñu lĕ pơhrŏ trun ƀun rin.

Hlăk ai tơring glông Lạc Dương djru man pơkra jơlan amăng plơi pla

Tơlơi gir run mơng tơring glông Lạc Dương hơmâo pơdah rơđah amăng bruă jak iâu abih bang gum hrŏm, djru brơi să Đưng K’Nớ. Hăng mơng akŏ thun 2021, khua mua tơring glông hơmâo pel ĕp hăng git gai ngă tui hơdôm boh tơhnal tong ten bơdjơ̆ nao bruă ngă hrưn đĭ tơlơi hơdip kơ mơnuih ƀon sang ƀơi să Đưng K’Nớ. Yua kơ bruă tuh pơ alin mơng djop anom bruă lĕ tơlơi kiăng, mơ̆ bruă hrưn đĭ tơlơi hơdip kiăng kơ mơnuih ƀon sang đăo gơnang kah lĕ bruă yôm phun kiăng pơđĭ kyar lăi hrŏm hăng pơgiong akŏ bruă man pơdong plơi pla phrâo amăng thun 2021 hnun mơn ƀơi să Đưng K’Nớ.

Tui hăng tơlơi pơkă blung a, truh thun 2020, tơring glông Lạc Dương, tơring čar Lâm Đồng dưi ngă pơgiong hơnong pơkă man pơdong plơi pla phrâo. Samơ̆, sem lăng hơdôm tơlơi dưi ngă hơđong kjăp, yua anun tơring glông hơmâo pơsit hơdai nao thun 2020. Bruă pơplih thun blan ngă pơgiong huăi hơget ôh. Yua yôm hloh lĕ ngă kjăp tui hơnong pơkă, lĕ tơlơi hơdip jơnap brơi mơnuih ƀon sang. Yua anun bruă kaih lĕ kiăng biă mă yua kơ man pơdong amăng sui thun amra ngă kjăp.

Hră pơhing Lâm Đồng čih

Siu Đoan: Pơblang