VOV4.Jarai- Mơguah lơ 28/12, Gơnong bruă gru grua - bơrơguăt drơi jăn hăng tuai čuă ngui tơring čar Daklak pơphun mông čơkă mă tơlơi tŭ yap yap anih djă pioh gru grua gưl tơring čar hăng anih djă pioh gru grua ƀơi jơnum min tơgŭ hơkrŭ tơring čar Daklak 1945. Anih djă pioh gru grua ƀơi Jơnum min tơgŭ hơkrŭ tơring čar Daklak 1945 ƀơi mrô jơlan 71 Lý Thường Kiệt, plơi prong Buôn Ma Thuột. Hơmâo man pơdong mơng thun 1943, anai lĕ sang ơi Đầu Viết Chúc, sa anih ngă hơkrŭ mơng tơhan Việt Minh. Dong mơng thun 1944, anai jing anih pơbưp, pơhiăp nao rai tơhan Việt Minh ƀơi Daklak hăng kual tong krah, anih dŏ hơdŏp lu tơhan ngă hơkrŭ. Amăng mlăm lơ 19/8/1945, ƀơi anai hơmâo pơphun Jơnum ječ mơng Khul git gai tơring čar Daklak, ba tơbiă lu tơlơi pơsit  kơ bruă tơgŭ hơkrŭ ƀơi tơring čar, pơgôp jing anih ba glăi tơlơi dưi prong amăng tal tơgŭ hơkrŭ blan 8 thun 1945 amăng dêh čar ta. Hrŏm hăng anun mrô jŭ yap anih djă pioh gru grua gưl tơring čar ƀơi Jơnum min tơgŭ hơkrŭ tơring čar Daklak thun 1945 hơmâo jao brơi gong gai plơi prong Buôn Ma Thuột wai lăng, tuh pơ alin pơkra ming hăng djă pioh hơdôm anŏ yôm kiăng kơ pơtô glăi gru grua kơ ană tơčô hăng jing anih tuai čuă ngui.

Siu Đoan: Pơblang