VOV4.Jarai - Truh lơ 25/3, Việt Nam găn rơgao 6 hrơi huăi hơmâo hlơi phrâo ƀă klin Covid-19 lar hyu amăng mơnuih mơnam. Truh ră anai, dêh čar ta hơmâo abih bang 1601 čô mơnuih ƀă klin Covid-19 yua lar hyu amăng dêh čar ta, amăng anun mrô mơnuih phrâo ƀă dong mơng lơ 27/1 truh ră anai lĕ 908 čô. Abih bang mơnuih jê̆ giăm hăng mut rai dêh čar mơng kual dêh čar hơmâo klin arăng pơclah lĕ 36.408 čô mơnuih. Amăng mrô mơnuih ƀă klin Covid-19 glăk dŏ pơjrao, mrô mơnuih pơčrang lăng huăi ƀă virus SARS-CoV2 lĕ 120 čô.

Tui Jơlan hơdră tlâ̆o ia jrao pơgang amăng dêh čar, amăng lơ 24/3, đơ đam dêh čar hơmâo dong 1.906 čô mơnuih tlâ̆o vaccine pơgang klin Covid-19. Lơ 24/3, hơdôm tơring čar Quảng Ninh, Tây Ninh, Đồng Tháp hơmâo pơphun tlâ̆o vaccine pơgang klin Covid-19. Yua anun truh ră anai, Vaccine pơgang klin Covid- 19 hơmâo pok pơhai ƀơi abih bang 19 boh tơring čar, ƀôn prong amăng rơwang tal 1.

Siu Đoan: Pơblang