VOV4.Jarai-Mơguah hrơi anai, lơ 15/3, vaccine tal 2 yua kơ Việt Nam pơkra sit nik lông mă yua črăn 1. Anai lĕ vaccine anăn Covitac mơ̆ng Kông ti vaccine hăng sinh phẩm ia jrao Nha Trang (IVAC) pơkra. Bruă lông tlâ̆o lăng amra yua kơ amom bruă IVAC ngă hrom hăng sang hră gưl prong Đại học Y Hà Nội hăng Anom ĕp kman duăm ruă dêh čar pô pơphun.

Him lăng črăn 1 amra lông ngă lăng ƀơi rơbêh kơ 120 čô mơnuih brơi tlâ̆o lông lăng, jing mơnuih suaih pral soh, mơ̆ng 18-75, pơpha jing 5 grup. Amăng anun 4 grup mă yua hơdôm liêu ia jrao vaccine anăn 3 microgam (mcg), 10 mcg hăng 1 mcg hơmâo pơhrua dơ̆ng ia jrao pơkŏn tá dược.

Sa grup lông tlâ̆o djuai ia jrao aka ƀu sit nik đơi ôh kiăng hơmâo boh tơhnal pơhno lăng. Sa čô mơnuih  arăng amra tlâ̆o dua arăt, sui 28 hrơi sa arăt. Hlâo kơ lông tlâ̆o lăng, boh tơhnal lông tlâ̆o lăng laih ƀơi hlô mơnong hăng anih pơkra ming lông yua lăng ăt tŭ yua mơ̆n huăi hơmâo tơlơi hơgĕt gĕt ôh, hnong pơgang kman kơtang biă mă.

Nay Jek: Pơblang