VOV4.Jarai - Kiăng pơtrut tui bruă pơtom hiăp rơkâo vaccine, Khua mir sir ơi Nguyễn Xuân Phúc phrâo hơmâo hră mơ-it kơ ơi Xác-lơ Mi-xen, Khua Jơnum min kual Mi Kô̆ (EU) rơkâo kơ EU djru pơpha brơi vaccine kơ Việt Nam. Amăng hră mơ-it nao, Khua mir sir ơi Nguyễn Xuân Phúc bơni kơ tơlơi lăng ba, tơlơi djru ba mơng Khul pơlir hơbit kual Mi Kô̆ pioh kơ Việt Nam amăng hrơi blan rơgao, biă ñu hơmâo djru 2 klăk 400 rơbâo liêu vaccine kiăo tui tơlơi djru COVAX. Khua mir sir lăi dêh čar Việt Nam glăk bưp lu tơnap tap biă mơng hơmâo djŏp mrô vaccine kơ giăm 100 klăk čô mơnuih laih anun măi mok ia jrao pơgang klin. Tui anun, kiăo tui hơdră ngă hrŏm abih bang glăk pơđĭ kyar hiam kơplah wah Việt Nam hăng EU, Khua mir sir hơmâo rơkâo EU djru ba lu hloh kơ Việt Nam kiăo tui hơdră bruă gum djru, pơpha brơi vaccine, djru boh thâo măi mok ia jrao pioh pơjrao kơ ƀing ƀă kman Covid-19 hăng lăi pơthâo tơlơi thâo thăi amăng bruă pơgang klin.

Siu H’Mai: Pơblang