VOV4.Jarai - Ƀơi anăp tơlơi tơnap tap mơng klin Covid-19 ƀơi lu tơring čar, ƀon prong amăng đơ đam dêh čar ngă kơ hơdôm rơbâo čô čơđai ƀơi hơdôm kual hơmâo klin khŏm nao pơčlah pơƀut mơ̆ ƀu hơmâo wŏt amĭ ama nao hrŏm hăng ră anai mrô čơđai ba nao pơčlah jai hrơi lu tui rĭm hrơi. Hrŏm hăng anun dŏ lu čơđai amuñ ƀă klin hăng kiăng pơgang mă pô rĭm hrơi, ngă kơ ƀing čơđai bral rơngal yua kơ hŭi laih dong arăng amra plư, pơgŏ drơi jăn, yua anun kiăng kơ hơmâo lu dong hơdră wai pơgang ƀing čơđai ƀơi hơdôm anih pơčlah pơƀut.

Tui hăng ƀing rơgơi kơhnâo, ƀing čơđai lĕ ƀing F0, F1 ba nao pơčlah pơƀut ƀu hơmâo hlơi amăng sang anŏ kiăo tui amuñ arăng plư, pơgô̆ brơi jăn, ngă bral rơngal yua kơ hŭi. Tui hăng yă Nguyễn Thị Thu Hiền, hơmâo lu tơlơi kơsem min brơi ƀuh, bruă pơčlah pơƀut amra ƀuh kơtư̆ juă ngă sat kơ ƀing čơđai, biă mă ñu lĕ ƀing čơđai glăk thun prong. Anai lĕ thun amuñ bơbeč sat nao akŏ dlô yua anun kiăng kơ pơtô pơblang brơi ƀing čơđai thâo hluh rơđah lĕ yôm biă mă. Mah djop khul grup bơdjơ̆ nao bruă pơčlah pơƀut mơnuih lêng kơ hơmâo arăng pơtô brơi amăng bruă pơgang brơi ƀing čơđai amăng anih pơčlah samơ̆ lơ̆m ƀing čơđai ƀu hơmâo amĭ ama kiăo tui amra ƀu hơmâo hlơi wai pơgang brơi. Yua anun yơh, hlâo kơ ba čơđai nao pơčlah, amĭ ama kiăng kơ črâo brơi ƀing čơđai bĕ hĭ hơdôm tơlơi sat răm:

“Amĭ ama kiăng pơtô brơi ƀing čơđai prong ƀiă, anai lĕ ƀing glăk thun truh hlăk ai, hrŏm hăng hơdôm tơlơi thâo thăi ƀing ta juăt hmư̆ mơng anet, ƀing čơđai kiăng thâo gơgrong mă pô kiăng hơđong amăng pran jua. Đa yua bral rơngal, kah hăng kiăng hơmâo amĭ ama jê̆ giăm . Yua anun bruă ƀuh tañ hơdôm tơlơi sat, thâo hlâo hơdôm bruă amra ƀuh amăng anih pơčlah, anai lĕ arăng amra plư, pơgô̆ drơi jăn, črâo brơi hlâo amra ngă ƀing čơđai kơđiăng ƀiă dong”.

Bruă ƀing čơđai ba nao pơčlah pơƀut juăt ngă ƀing čođai hŭi yua kơ pơplih anih dŏ hơdip, laih dong sang anŏ hơmâo mơnuih F0 ƀudah djai yua klin ngă, tơlơi anai amra ngă kơ ƀing čơđai bơngŏt, hŭi rơhyưt hơdôm tơlơi pơglăi mơng klin kheng. Yua anun yơh, ƀing čơđai kiăng wai lăng hmao tlôn mơng ƀing rơgơi kơhnâo kiăng kơ djru brơi ƀing čơđai găn rơgao tơlơi anai. Bruă pơtô pơblang hăng pơjrao kiăo tui lăng amra mă yua ƀơi hơdôm anih pơčlah pơƀut. Yă Nguyễn Thị Thu Hiền mơnuih thâo rơgơi gah bruă anai brơi thâo:

“Bruă ĕp ƀuh tañ lĕ yôm phăn biă mă. Ƀing ta juăt ƀuh lu bruă ngă ƀu tui tơlơi juăt rĭm hrơi anun lĕ ƀu gưt huă asơi, ƀu gưt mơnơi, ƀu gưt pơhiăp bit hăng arăng ƀudah kơtang tui hơmâo mơn, ƀing čơđai amra ngă hơdôm tơlơi sat gah rơngiao anun lĕ ngă soh tơlơi phiăn hăng pơčuih hăng arăng. Gah pran jua amuñ hil añ ƀudah hning rơngô̆t. Tơlơi anai kar hăng ngă pơgô̆ amăng pran jua ngă kơ ƀing čơđai ƀu hơđong amăng akŏ glô, yua anun ƀing ta kiăng kiăo tui lăng hăng ƀing čơđai kiăng hơmâo tơlơi črâo ba mơng ƀing rơgơi kơhnâo”.

Truh ră anai Ding jum bruă mă, tơhan rơka hăng mơnuih mơnam ăt hơmâo lu tơlơi pơtrun kiăng kơ wai pơgang brơi ƀing čơđai ƀơi anih pơčlah pơƀut kah hăng amăng hơdôm hrơi pơčlah mơnuih mơnam … Hăng ƀing čơđai arăng pơgô̆ drơi jăn ƀudah hơmâo hơdôm tơlơi bơbeč sat amăng akŏ glô ăt hơmâo hơdôm tơlơi pơkă tong ten kiăng kơ djru hmao tlôn; tơlơi pơkă ăt hơmâo tơlơi glăm ba mơng anih pơčlah. Yă Vũ Thị Kim Hoa, Kơ-iăng khua anom bruă wai lăng čơđai (Ding jum bruă mă, tơhan rơka hăng mơnuih mơnam) brơi thâo, hơdôm anih pơčlah hơmâo čơđai kiăng iâu mrô iâu ječ lĕ 111 kiăng kơ pơtô pơblang kơ bruă: Wai lăng ƀing čơđai, djru kiăng ƀing čơđai hơđong amăng pran jua, tañ ĕp ƀuh hơdôm tơlơi sat pơglăi amăng tơlơi pơmĭn mơng ƀing čơđai lơ̆m ba nao pơčlah; djru brơi hăng pơsir ječ hơdôm tơlơi bơbeč sat kiăng pơgang brơi ƀing čơđai. Yă Vũ Thị Kim Hoa brơi thâo:

“Anih pơčlah pơƀut kiăng kơ gum hrŏm hăng hơdôm anom bruă bơdjơ̆ nao anun lĕ Jơnum min mơnuih ƀon sang să, ƀing apăn bruă gah wai lăng ƀing čơđai, kông ang, anom bruă ia jrao. Lơ̆m djru brơi ƀing čơđai kiăng ngă hiưm pă tañ ĕp ƀuh hơdôm tơlơi amuñ bơbeč sat nao ƀing čơđai kiăng hmao tlôn djru brơi. Pơhmutu lĕ bơdjơ̆ nao tơlơi pơmĭn mơng ƀing čơđai, bơbeč sat nao tơlơi hơdip yua anun kiăng kơ hơmâo tơlơi gum drju mơng anom bruă ia jrao kiăng pơhlôm brơi tơlơi suaih pral kơ ƀing čơđai. Hăng bruă ngă sat hơmâo lăi pơthâo bơdjơ̆ nao plư hăng pơgô̆ ƀing čơđai amra pơsir djơ̆ hăng tơlơi phiăn”.

Kiăng kơ wai pơgang brơi ƀing čơđai lăi hrŏm hăng ƀing čơđai ƀơi hơdôm anih pơčlah pơƀut lơ̆m ƀu hơmâo hlơi amăng sang anŏ kiăo tui, anom bruă wai lăng čơđai rơkâo djop tơring čar kiăng kơ lăi pơthâo na nao kơ bruă bơbeč sat nao ƀing čơđai yua klin Covid-19 ngă. Hơdôm bruă sat răm bơdjơ̆ nao ƀing čơđai kiăng lăi pơthâo brơi djop gưl, anom bruă bơdjơ̆ nao amăng tơring čar hăng anom bruă wai lăng ƀing čơđai kiăng pơsir hĭ, pơtô pơblang, djru brơi hmao tlôn.

Siu Đoan: Pơblang