VOV4.K’ho- Jăt Kụk Kảnh sát gùng lòt gơwèt Ƀộ Kwang àng dê yal, tàm 03 ngai sa tềp Tây (bơh ngai 01/01 tus ngai 03/01), jơh gùt lơgar gơlik geh 64 dơ̆ rềs àr gùng lòt, lơh 38 nă cau chơ̆t, gơtìp sồt să 35 nă cau. Tàm khà do, gùng rơndeh ù gờl gơbàn 63 dơ̆, lơh 37 nă cau chơ̆t, gơtìp sồt să 35 nă cau.

Lơh jăt tơngai lơh uă sền gàr rơndăp tăp sèng, ờdo ờdă gùng lòt, rơndăp tăp sèng ờdo ờdă mpồl bơtiàn tàm dơ̆ lồi nam, sa tềp Tây, sa tềp Bơhiàn dà lơgar dê Ñâm Zần mờ ală dơ̆ lơh chờ bồ sơnam pa 2022, tàm 03 ngai do, Kảnh sát gùng lòt Kwang àng ală tiah neh lòt sền, gŏ mờ lơh glài rlau 19 rbô 200 nă cau lơh tìs rơndăp tăp sèng, ờdo ờdă gùng lòt ù gờl; lơh glài mờ priă là 22 tơmàn 650 tơlak đong; kŭp ai rlau 1 rbô 200 sră măy rơndeh ală bơta, tàm hơ̆ lơh tìs ñô ơlak, bièr lơh glài 812 nă cau mờ 04 nă cau măy rơndeh geh ngui sơnơm ma túy.

Cau mblàng Lơ Mu K’Yến