Rơndap broă lơh geh lơh tàm bă ù ơnàng mờr 6 lồ, geh lơh 18 ơdŭ bal mờ 630 nă kơnòm bơsram, geh wil tơl cơldŭ bơsram, hìu sền sră, hìu tàp pràn să jan mờ anih ơm sa bic tơn pa ngan ai 320 nă kơnòm bơsram in; kờp jơh priă bơcri lơh 150 tơmàn đong bơh ală mpồl lơh sa kă bro gơ wèt Ƀộ Ling klàng dong kờl. Tŭ lơh gơs, hìu bơsram rơp pơgồp bơnah tơnguh bơta niam drơng bơto bơtê mờ bơsram ai mờr 700 nă kơnòm bơsram tiah nhàr lơgar, tiah làng bol jơi bơtiàn dồ êt nă cau in. Đơs tàm dơ̆ bơyai lơh, Tổng Ƀí thư ồng Tô Lâm đơs nền, bơto bơtê mờ bơsram là broă lơh dờng bơh dà lơgar dê; sồr Ƀộ Ling klàng gàr di tŭ tơngai hơ pơrgon, bơta niam, kơ̆ kơnhăp broă lơh; mờ kung sồr càr Dăk Lăk, gah bơto bơtê mờ bơsram mờ gơnoar atbồ ƀòn lơgar rơcang niam mpồl cau lơh broă, tơngume lơh broă, atbồ, ngui geh cồng nha phan bơna tơnơ̆ tŭ lơh gơs.

Di dơ̆ rơcang wă rò sa tềp bơhiàn dà lơgar nam ơseh 2026, Tổng Ƀí thư ồng Tô Lâm neh lòt còp, nting bơr sa tềp kwang bàng, cau ling Pôs ling sền gàr tiah nhàr lơgar Ea H’leo – mpồl gam lơh kơnòl broă tơn tàm tiah nhàr lơgar bơh càr Dăk Lăk dê.