Mho ngai 10/2, tàm Hà Nội, di dơ̆ rcang wă rò sa tềp nam pa nam Ơseh 2026, Tổng Ƀí thư ồng Tô Lâm, Ƀí thư Anih duh broă đơng lam Đảng Dà lơgar, neh tus bal mờ đơng lam dơ̆ tìp mat ală kwang bàng, ling geh griăt kấp dờng mpồl ling klàng neh jơh sơnam lơh broă, ơm rơlô lơh broă. Tàm dơ̆ tìp mat, Tổng Ƀí thư pơyoa jơnau gờm chờ nam pa, gờm chờ pràn kơl dang să jan tus mờ ală cau ala mat; mơkung yal dồ ết bè bơta tàm dunia, tàm tiah do, ală tềl lời wơl pơn rơ ngan tàm tơngai lơh broă Pơrjum dờng dơ̆ 13, cồng nha Pơrjum dờng dơ̆ 14 mờ ală bơta pa tàm bồ tơngoh kơlôi sơnơng, pơlam gùng dà bơtàu tơnguh dà lơgar tàm tơngai tus.

Tổng Ƀí thư ồng Tô Lâm đơs sùm jơnau sồr pơn jat tai bơt bơtàu Mpồl Ling klàng làng bol kăc màng, di pal, nhăp nhar, pa ngan tàm tơngai pa brồ guh bơh jơi bơtiàn dê, lơh geh jơnau sồr kơnòl broă sền gàr Dà lơgar tàm bơta pa. Tổng Ƀí thư tơngŏ bơta pin dờn mờ nùs nhơm khin cha cíñ trị kơ̆ kơl jăp, mờng chài rơ̆ ru tàm bơta geh ngan li la, ală kwang bàng, ling geh griăt kấp dờng ơm rlô lơh broă rơ̆p pơn jat tai tă pơgồp uă jơnau đơs jơh nùs, song dơ pă ai broă lơh bơt bơtàu, lơh niam wơl Đảng, bơt bơtàu mpồl ling phàu crong Làng bol ngan ngồn sàng goh, kơnhăp pràn, dòn song ngan mờ Đảng, Dà lơgar mờ Làng bol.