Wă mpồl, ồng Lương Nguyễn Minh Triết - Ƀí thư Tỉñ ủy càr Dăk Lăk đơs niam cồng nha lơh broă bal tàm tơngai lài đah 2 càr, đơs nền bơta git gơp rềp bal, lơh bơyô bal pơn jat tai geh gàr kơ̆. 

Đơng lam càr Dăk Lăk kơp kờñ bàr gah sơlơ chồl pràn lơh broă bal tơl làm, ngan là tàm ală gah lơh sa, kă bro phan, bơcri priă, lơh sa suơn sre kơnhăp jŏ; lơh gơlik bơta niam nàng mpồl lơh sa kă bro tàm tơrbŏ bal, rề ơnàng broă kă bro phan; mờ kung pơgồp bal jơh nùs tàm broă atbồ, sền gàr tiah nhàr lơgar, gàr kơ̆ lơngăp lơngai, rơndap tap sèng. Ồng Thang Sa Vun đơs bơta kơp kờñ sơlơ tơnguh tai cribơyai, tam pà mờng chài bè lơh sa suơn sre ngui măi mok pa, lơh sa mờ măi mok, lòt nhơl, pơgồp bơnah lơh niam rlau tai bơta git gơp lơh bơyô, lơh broă bal kơnhăp kơ̆ đah Việt Nam mờ Campuchia.