VOV4.K’ho - Drim òr (02/06), tàm Hà Nội, Mpồl duh broă ai khà pơrlòng sră ƀăo Dà lơgar dơ̆ 15 nam 2020 neh sơn đờm dar ai khà dŭt ndơl ală jơnau cih sră ƀăo. Tus bal pơrlòng nam do geh 114 mpồl mờ 190 nă cau lơh broă bal, tus bal tàm 11 bơta pơrlòng jăt mờ kơrnoăt geh ai.

Mờ 1 rơbô 823 jơnau cih tơl bơta pràn tus pơrlòng. Do là nam geh khà jơnau cih tus pơrlòng uă ngan bơh lài tus tŭ do. Tàm 2 ngai bơh ngai 02 tus 03 nhai 6, Mpồl duh broă ai khà pơrlòng sră ƀăo Dà lơgar geh rơwah bơh 151 jơnau cih jăk chài ngan nàng jào khà pơn jờng.

Jăt ồng Thuận Hữu, Chủ tịch mpồl sră ƀăo Việt Nam yal, tơngu me ală jơnau cih tus pơrlòng nam do neh cih di pal mờ tơngu me dờng bơh broă lơh sa, chính trị, bơta chài rơgơi, mpồl bơtiàn. Tàm hơ̆, yal bè ală broă pơrjum dờng Đảng ală cấp, pơrjum dơ̆ 13 Đảng dê, broă sơndră mờ kòp Covid-19; broă tam dră mờ sa kuề sa koà, hoàc huơr, ờ niam pơn jăt tai geh yal nền nòn ngan, di tŭ. Uă jơnau cih geh nùs nhơm sền gŏ, dră wơl jăk chài ngan, geh cồng nha mpồl bơtiàn, geh bơta pràn gơrềng bal, geh anih lơh broă geh gơnoar iăt, sền wơl, bơsong.

Cau mblàng Ndong Brawl