VOV4.K’ho- Pơn jăt tai dơ̆ lơh broă lùp mờ hơ jơnau lùp, drim do 11/11, Bộ trưởng Bộ Lao động, Thương binh mờ Xã hội ồng Đào Ngọc Dung pơn jăt tai hơ jơnau lùp gơwèt mờ mpồl broă gơwèt gah broă lơh cau lơh broă, cau ling sồt să mờ mpồl bơtiàn. Pơn jăt hơ̆, Bộ trưởng Bộ Giáo dục mờ Đào tạo ồng Nguyễn Kim Sơn mờ Bộ trưởng Bộ Kế hoạch mờ Đầu tư ồng Nguyễn Chí Dũng kung hơ jơnau lùp bè mpồl broă gơwèt gah broă lơh bơto bơtê mờ gah broă lơh broă rơndăp lơh mờ bơcri priă.

Tàm dơ̆ lùp mho ngai 10/11, Bộ trưởng Bộ Lao động, Thương binh mờ Xã hội neh tơrgùm lơh loh ală broă lơh sền gròi kơnòm kòn đời tơnơ̆ tơngai gơbàn kòp dờng. Tơnơ̆ dơ̆ hơ jơnau lùp bơh Bộ trưởng Bộ Lao động, Thương binh mờ Xã hội ồng Đào Ngọc Dung dê tơn, drim do 11/11, Quốc hội pơn jăt tai broă lơh lùp bal mờ mpồl broă dơ̆ pe gơwèt gah broă lơh bơto bơtê. Tàm mho ngai do 11/11, Quốc hội pơn jăt tai lùp mpồl broă dơ̆ puan gơwèt gah broă lơh broă rơndăp lơh mờ bơcri priă, tơrgùm tàm ală broă lơh bơtàu tơnguh wơl mờ bơtàu tơnguh lơh sa tàm tơngai bơta bè ờs pa; ală broă lơh dong kờl, tă bơsong kal ke ai mpồl lơh sa kă bro, hợp tác xã, hìu bơnhă kă bro in nàng bơtàu tơnguh wơl, bơtàu tơnguh lơh sa, kă bro.

Cau mblàng Lơ Mu K’Yến