Sơlơ mờr tus ngai Satềp, broă tàm ală anih ơhò ơm lơh ka tàm tiah đah măt tơngai lik càr Dăk Lăk sơlơ gal ngan. Git nđờ rơhiang nơm ơhò lơh sa bơh tàm dà lềng dờng ơnàng jăt gah bồt Trường Sa, git nđờ rơhiang nơm ơhò ndai neh rê, tàm ơhò geh uă ngan ka tăc geh uă ngan priă. Cau lơi kung chờ hờp tài geh wă nam pa mờ phan pà geh uă bơh dà lềng dê. Ồng Bùi Văn Xông, tàm sơnah ƀòn Phú Yên, càr Dăk Lăk chờ hờp pà git: “Nam do bồ nam broă lơh ka geh ƀuơn tus mờ làng bol dê, gŏ kung chờ hờp ngan, rơ̆p lòt mờ dùl nơm ơhò geh bơh 70 tus 80 nơm ka den ưn ngài trồ tiah ngan. Khà lơh geh niam bloh. Priă tăc ka den kung kơl jăp”.

Cau lơh ka Phạm Đắc Dũng, tàm tiah ƀòn 4, sơnah ƀòn Phú Yên chờ hờp đơs: “Nam do trồ tiah niam, càl khồm ờ pràn, ka geh uă. He lòt lơh tàm bơh 20 tus 21 ngai den lơh geh 2 rơlao tấn, tam pà bal tơl nă cau geh di pơgăp bơh 15 tus 16 tơlăk đong. Oh mi lòt lơh ka geh priă niam”.

Tơmŭt bal, ală càr Tây Nguyên bè, Dăk Lăk, Gia Lai, Lâm Đồng ndrờm geh dà lềng. Dà lềng ờ mìng là phan geh is, ka ti, ka mờ gam là mpồng lik tăc phan mờ lơgar bơdìh ai geh bơta pràn lơh sa suơn sre dờng màng ngan tàm tiah đah bơnơm dê, mờ kơphe, tiêu, sầu riêng, biăp, bơkào ndrờm geh lơh uă ngan tàm gùt lơgar dê. Jăt ồng K’ Bril, Kwang lam bồ thôn Kambutte, sàh Đơn Dương, càr Lâm Đồng đơs, bơta dờng pràn pa bơh lơh sa suơn sre-brê bơnơm-phan tàm dà Tây Nguyên dê ờ mìng kờp mờ bă ù dờng ơnàng, mờ kờp mờ cồng nha bơh broă lơh sa suơn sre ngăc ngar dê. “Tŭ do làng bol neh ngui măi mok dờng, bơcri priă lơh phan tuh dà ngăc ngar, bơta chài tam ngai sơlơ gơguh uă… Thôn Kambute lài do geh uă ngan là hìu lơh bè ờs, tŭ do geh uă ngan hìu lơh 2 cờn, 3 cờn, khà hìu geh rơndeh ôtô uă ngan sơl”.

Tơn jơh nam 2025, mìng is priă tăc phan geh lơh bơh broă lơh sa suơn sre, brê bơnơm, phan tàm dà tiah Tây Nguyên mờ Đah jum Tàm gùl lơgar neh geh 140 rơbô tơmàn đong jăt mờ khà priă geh tam gơl. Gùng rơndeh lòt mhar Khánh Hoà – Buôn Ma Thuột neh ai ngui uă gơl; gùng rơndeh lòt mhar Pleiku – Quy Nhơn neh sơn đờm mŭt lơh, dong kờl khà phan geh lơh bơh broă lơh sa suơn sre, brê bơnơm, phan tàm dà uă bơh Tây Nguyên dê ƀuơn tus tàm anih ơhò dà lềng ơm. Phó Giáo sư. Tiến sìh ồng Lê Đức Niêm, Phó Kwang lam bồ Hìu bơsram Đại họk Tây Nguyên đơs là, Tây Nguyên tŭ do neh geh pơgồp bal lơh sa gơs niam rơlao. “Tây Nguyên ờ mìng gam là tiah lơh sa suơn sre ha là năng lượng lơh geh wơl tai, mờ neh pơgồp bal nền nòn mờ logistics, lơh sa dà lềng, broă lơh drơng ala, lòt nhơl, lơh sa mờ măi mok lơh gơs phan bơh tiah Jăt gah dà lềng Đah jum Tàm gùl lơgar dê. Bơh uă bơta lơh do neh ai geh bơta dờng ơnàng uă ngan nàng lơh gơs ală mpồl phan kwơ geh lơh gơs”.

Bal mờ phan kă bro geh bơta pràn bơh tiah lơh sa suơn sre, brê bơnơm, phan tàm dà dờng ngan mờ uă bơta ngan gùt lơgar dê, Tây Nguyên pa gam geh rơlao 1 rơbô kơi sồ gùng jăt gah dà lềng, mờ ală ƀlàng dà lềng gơwèt niam ngan gùt dunia dê. Dà lềng ñsừc tàm tiah dà lềng, cing mồng mpong săp tàm tiah brê bơnơm dờng, lòt nhơl broă lơh drơng ala Tây Nguyên dê rơ̆p mhar pờ tus dùl pang pa. Jăt ồng Lương Nguyễn Minh Triết, Ƀí thư Tỉñ ủy càr Dăk Lăk đơs, nàng lơh jăt mùl màl jơh ală bơta pràn bơtàu tơnguh, lơh geh uă ngan ală bơta pràn bơh tiah do dê, ală tiah gam lơh ngan ai jơh bơta pràn tàm broă tam gơl sồ mờ phan bơna tơrbŏ bal Đah măt tơngai Lik mờ Đah măt tơngai Mŭt.

Tàm càr Dăk Lăk, tam gơl sồ neh gơs broă pal geh sồr lơh: “Jal mhar lơh broă rơndăp bơtàu tơnguh bơta chài măi mok tơngai bơh nam 2026 tus 2030… lơh ală broă dờng càr dê bè bơsong sră nggal, broă lơh drơng ala dà lơgar, bè bơtàu tơnguh lơh sa suơn sre, lòt nhơl ngăc ngar; rơcang tam dră mờ rềs àr bơh trồ tiah, atbồ sền gàr brê”.

Bơh ală dơ̆ ơhò lòt lơh ka tàm dà lềng di tàm Satềp, ală ƀlàng dà lềng jòng bal mờ bràs kò tus mờ ală suơn kơphe dờng ơnàng bal mờ bă suơn tam phan mờ hìu jàl, hìu krơh ngăc ngar, bơta niam bè dùl tiah lơh sa pràn kơl dang Đah jum tàm gùl lơgar mờ Tây Nguyên gam sơlơ gŏ loh làng ngan. Tŭ “dà lềng tơrbŏ bal mờ brê bơnơm” bơh ală gơl gùng rơndeh lòt mhar mờ phan bơna sồ, tiah do ờ mìng tơnguh niam rài kis ai làng bol in mờ gam tŭ lơi kung rơcang lài brồ să lơh gơs dùl bă tiah gơguh lơh sa pa, pơgồp bal di pal tàm tơngai wèt tus rài brồ să bơh jơi bơtiàn dê.