VOV4.K’ho- Bơh quý 2/2020 tus tŭ do, broă lơh jun cau lơh broă lòt lơh broă tàm lơgar ndai kung gam là dùl tàm ală gah gơtìp gơrềng kơn jơ̆ kơn jŭt ngan rlau jơh tài bơh kòp dờng Covid-19, mìng tơnơ̆ gah lơh broă rơndeh par, hìu năc, nhơl chờ. Jat Cục Atbồ cau lơh broă tàm lơgar ndai (Bộ Lao động, Thương binh mờ Xã hội), khà kờp yal bơh ală mpồl lơh sa kă bro pà gĭt: tàm 4 nhai pa do, kờp jơh ală cau lơh broă lơgar Việt Nam lòt lơh broă tàm lơgar ndai là mờr 35 rơbô nă cau, geh 38,79% broă rơndap lơh nam.

Drà kă bro lơgar Nhờk dờp uă cau lơh broă Việt Nam ngan rlau jơh mờ mờr 18 rơbô 400 nă cau; pơn jat hơ̆ là Đài Loan (lơgar Lo) rlau 15 rơbô nă, Hàn Quốc rlau 280 nă cau; Hungary rlau 200 nă cau mờ ală drà kă bro ndai. Mìng is tàm nhai 4, kờp jơh cau lơh broă lòt lơh broă tàm lơgar ndai là rlau 5 rơbô 300 nă cau. Kờp dŭ, broă jun cau lơh broă lòt lơh broă tàm lơgar ndai pơn jat tai gơtìp kal ke tài bơh kòp Covid-19.

Cau mblàng K’Hạnh