VOV4.K'ho- Ngui niam gơnoar broă mờ kơnòl bơh ngân hàng kă bro tờm ngan dê tàm tŭ lam lơh jăt gùng dà broă lơh priă jền, bơcri priă bơtàu tơnguh lơh broă sa sươn sre mờ ƀòn lơgar bơh nam 2020 tus tŭ do, Agribank neh lời ai rlau 1rbô tơmàn đong priă cồng nàng tơrmù priă cồng ai càn priă dong kờl cau càn priă sơrlèt gan kòp dờng Covid-19, mơkung lam lơh uă broă lơh ai càn priă dong kờl priă cồng, sa priă cồng dùl lơyah rlau bơh 2% tus 2,5% pơndrờm mờ priă cồng ai càn bè ờs bal mờ kờp jơh priă jền là rlau 300 rbô tơmàn đong lời ai cau càn priă là mpồl lơh sa kă bro di mơ mờ dềt in, cau càn priă uă, cau càn priă dùl nă să is mờ mpồl lơh sa kă bro FDI.

Tềng đăp bơta gơbàn kal ke bơh kòp dờng Covid-19 dê lơh gơrềng uă ngan tus jơh ală bơta tàm rài kis, lơh sa- mpồl bơtiàn; nàng di tŭ dong kờl cau càn priă gờñ bè ờs wơl broă lơh sa kă bro, sơrlèt gan kal ke, Agribank rơcăng lài tơrmù tai priă cồng ai càn gơwèt mờ jơh ală cau càn priă là cau dùl nă să is mờ mpồl cau càn priă bơh priă VND tàm Agribank.  

Mùl màl là bè do, gơwèt mờ bơnah priă càn ngai 15/07/2021, Agribank tơrmù tài 10% pơndrờm mờ priă cồng ai càn gam ngui gơwèt mờ priă dồs ai càn lơyah tơngai geh priă cồng bơh 5% dùl nam rlau hơđang mờ priă ai càn di mơ tơngai, jŏ tơngai geh priă cồng bơh 7% tàm dùl nam rlau hơđang. Kờp dŭ, mờ broă pơn jăt tai tơrmù priă cồng dơ̆ do, Agribank lời pơgăp 5 rbô 500 tơmàn đong nàng dong cau càn priă in.

Bal mờ hơ̆, Agribank kung neh jơh nùs tă bơsong kal ke ai cau càn priă in tàm broă lơh jăt niam, geh cồng nha ală gùng dà broă lơh dong kờl, bè: Rơndăp tăp sèng wơl dồs tờm mờ cồng; Ờ sa priă pơyua priă tàm lơgar mờ dong kờl rlau 130 tơmàn đong ai broă lơh rơcăng sơndră kòp Covid-19 in;...Bè hơ̆, bal mờ broă pơn jăt tai tơrmù priă cồng ai càn, dơ̆ 5 tàm pơn jăt sùm neh tơngŏ gơnoar broă lam lài, kràn cê jơh nùs bơh Agribank dê tàm broă tàm sơm băt tê bal bal mờ Đảng, Dà lơgar mờ Chính phủ lơh jăt “jơnau kờñ dơ̆ lĕ bal”: kơryan kòp bơtờp mờ bơtàu tơnguh lơh sa. Broă lơh tơrmù priă cồng ai càn geh lơh jŏ jòng tus jơh ngai 31/12/2021 do mờ geh ngui làm uă tàm 2.300 anih lơh broă bơh Agribank dê tàm jơh gùt lơgar.

Cau mblàng Lơ Mu K’Yến