VOV4.K’ho- Jăt broă lơh tàm dơ̆ pơrjum, ngai do 12/11, Quốc hội pơn jăt tai dơ̆ lùp mờ hơ jơnau lùp gơwèt mờ Bộ trưởng Bộ Kế hoạch mờ Đầu tư, Thủ tướng Chính phủ ồng Phạm Minh Chính kung geh lơh loh ală broă geh gơrềng mờ hơ jơnau lùp bơh kuang bàng Quốc hội dê. Tàm mho ngai 11/11, Chủ tịch Quốc hội kung neh đơng lam dơ̆ lùp mpồl broă dơ̆ puan gơwèt gah broă lơh broă rơndăp lơh mờ bơcri priă.

Dùl ròt broă duh hồl neh geh kuang bàng Quốc hội lùp Bộ trưởng Bộ Kế hoạch mờ Đầu tư ồng Nguyễn Chí Dũng, bè: Broă lơh bơtàu tơnguh wơl mờ bơtàu tơnguh lơh sa tàm tŭ tơngai pa; Dong kờl, tă bơsong kal ke ai mpồl lơh sa kă bro in nàng bơtàu tơnguh wơl, bơtàu tơnguh lơh sa, kă bro; Broă lơh lơh mhar broă ai priă jền bơcri dà lơgar dê, ngan là ală rơndăp broă lơh kuơmàng dà lơgar dê. Hơ jơnau lùp bơh kuang bàng Quốc hội dê, Bộ trưởng Bộ Kế hoạch mờ Đầu tư ồng Nguyễn Chí Dũng đơs, broă lơyài ai priă jền bơcri dà lơgar dê là tài bơh broă lam lơh rơndăp broă lơh bơcri priă tàm ƀòn lơgar.

Bè broă lơh bơtàu tơnguh wơl mờ bơtàu tơnguh lơh sa tàm tŭ tơngai pa, Bộ trưởng Bộ Kế hoạch mờ Đầu tư đơs, bơnah priă dong kờl lơh gơhòi gơ jà ngui sa rài lơh sa tàm nam 2009 neh lơh geh cồng nha dong kờl bơtàu tơnguh wơl lơh sa tŭ tơngai tơnơ̆ hơ̆, mơya kung neh pà gŏ mờng chài nàng lơh bơnah priă dong kờl bơtàu tơnguh wơl lơh sa geh lam lơh niam rlau tàm tơngai tus.

Cau mblàng Lơ Mu K’Yến