VOV4.K’ho- Tềng đăp mờ kòp Covid-19 gam gơtìp kal ke, tus drim òr (04/05), gùt lơgar geh 09 càr, ƀòn dờng ai kơnòm bơsram ơm ing bơsram tus tàm tŭ geh jơnau yal pa.

Hơ̆ là ƀòn dờng Hà Nội, ală càr Bắc Giang, Hà Nam, Vĩnh Phúc, Hưng Yên, Yên Bái, ƀòn dờng Đà Nẵng, ală càr Quảng Nam, An Giang. Kờñ gàr niam broă bơsram sră, broă bơto mờ bơsram geh tam gơl bơh bơto tơn tàm hìu bơsram gơs broă bơto tàm internet.

Tàm càr Vĩnh Phúc, do là tiah gam gơtìp kòp Covid-19 lơh gơbàn kal ke, nàng gàr niam ờ do ờ dă ai kơnòm bơsram in, UBND càr neh tơlĭk chỉ thị ai rơlao 300 rơbô nă kơnòm bơsram bơh mầm non tus cấp 3, hìu bơsram giáo dục thường xuyên mờ bơsram broă lơh tàm càr ơm ờ lòt bơsram bơh ngai 03 nhai 5 tus jơh ngai 08 nhai 5. Tơnơ̆ mờ tơngai do, jăt tàm bơta mùl màl bơh kòp gơtờp, UBND càr geh sền wơl mờ geh jơnau đơng lam di pal.

Tàm càr Hưng Yên, Sở Giáo dục mờ Đào tạo càr neh dan mờ UBND càr ai kơnòm bơsram tàm càr do ơm ờ lòt bơsram bơh ngai 04 nhai 5 tus tàm tŭ geh jơnau yal pa nàng rơcang sơndră mờ kòp Covid-19.

Cau mblàng Ndong Brawl