VOV4.K’ho- Lơh jat sră nggal pơyua bơh Thủ tướng Cíñ phủ dê bè rơcang lài sơndră mờ càl rbut dờng RAI, bơh ngai 17/12, ală càr, ƀòn dờng tàm tiah tàm gùl lơgar ờ ai jơh ală ơhò, plung lòt tàm dà lềng lơh broă, geh bal pơndiang phan gùng dà lềng tàm lơgar. Ƀòn dờng Đà Nẵng neh ờ ai ơhò, plung lòt tàm dà lềng; rơndap ai ơhò plung pleh càl rbut dờng jòi anih ơm ờdo ờdă nàng pleh càl rbut dờng anih ơhò ơm Thọ Quang mờ ală anih ơhò ơm neh geh rơndap lài...

Bơh 12 jơ klò ngai, ngai 17/12, Gah đơng lam mpồl ling sền gàr tiah nhàr dà lơgar càr Quảng Nam mờ ală kơnhoàl, thị xã, ƀòn dờng kềng gah dà lềng ờ ai ơhò, plung lòt tàm dà lềng. Bơdìh hơ̆ tai, ală mpồl lơh broă yal ơhò, plung gam lơh broă tàm dà lềng in git rơcang lài ntrờn rê hờ gah dà lềng, jòi anih ơm pleh ờdo ờdă. Tàm càr Bình Định, ală tiah neh sồr ală ơhò, plung gam lơh broă tàm dà lềng mhar lik bơh tiah ngòt rơngơt. Neh geh rlau 50 dơ̆ ơhò lơh ka bal mờ mờr 500 nă cau lơh ka  ală càr Quảng Nam, Quảng Ngãi, Bình Định, Phú Yên mờ Khánh Hòa mut tàm ală anih ơhò ơm gơ wèt bồt Song Tử Tây mờ bồt Sinh Tồn, kơnhoàl Trường Sa nàng ơm pleh càl rbut dờng RAI.

Cau mblàng K’Duẩn