VOV4.K’ho - Jăt jơnau bơh Sở Giáo dục mờ Đào tạo càr Kon Tum yal, dơ̆ pơrlòng jơh bơsram cấp 3 dơ̆ sơnrờp nam do geh khà kơnòm pơrlòng tơl điểm jơh bơsram geh 98,26% mờ geh dùl nă kơnòm pơrlòng geh điểm uă ngan gùt lơgar khối D.

                                             Dùl anih pơrlòng jơh bơsram cấp 3 dơ̆ sơnrờp tàm càr Kon Tum

Dơ̆ pơrlòng sơnrờp pa do, càr Kon Tum geh 4 rơbô 483 nă kơnòm pơrlòng tus pơrlòng mờ khà tơl điểm jơh bơsram là 4 rơbô 405 nă. Càr Kon Tum kơnòm pơrlòng geh điểm uă gùt lơgar khối D là kơnòm pơrlòng Bùi Thị Ngọc Quỳnh, ơdŭ 12 chuyên Văn, hìu bơsram cấp 3 Chuyên Nguyễn Tất Thành mờ kờp jơh khà điểm 29,15. Càr Dak Nông geh khà tơl điểm jơh bơsram cấp 3 nam 2021 geh 97,1% mờ 6 rơbô 702 nă kơnòm pơrlòng dan cih măt pơrlòng. Tàm hơ̆, 10 hìu bơsram geh khà tơl điểm jơh bơsram cấp 3 geh 100%. Jăt khà kờp, geh 80 jơnau pơrlòng geh điểm uă ngan tàm ală môn bơh 9,25 rơlao hờ đang. Tàm hơ̆, geh 57 jơnau pơrlòng điểm 10 geh: Giáo dục công dân 50 jơnau, Dà Mỹ 4 jơnau mờ Sinh học 3 jơnau.

Gam tàm càr Dak Lak, khà kơnòm pơrlòng tơl điểm jơh bơsram cấp 3 dơ̆ sơnrờp bơh càr do dê kung geh 97,01%, gơguh 0,6% pơn ndờm mờ nam 2020. Geh 10 hìu bơsram cấp 3 mờ 3 anih (tàm khà 58 hìu bơsram cấp 3 mờ 15 anih bơto broă lơh - bơto thường xuyên) geh khà kơnòm bơsram jơh bơsram cấp 3 geh 100%. Jăt khà kờp bơh Sở Giáo dục mờ Đào tạo càr Dak Lak yal, gùt càr geh 292 nă kơnòm bơsram geh điểm bơh 9,5 rơlao hờ đang gơwèt mờ môn pơrlòng krơi is.

Cau mblàng Ndong Brawl