VOV4.K’ho- Tơngai pa do, tàm càr Gia Lai, ală mpồl ling klàng tàm càr neh pơgồp bal niam mờ Mpồl đơng lam rcang sơndră kòp Covid-19 ală kấp lam lơh ală broă lơh sơndră kòp. Do ngan là dùl tàm ală mpồl tờm ngan, lam lài tàm tiah lam lài rcang sơndră kòp Covid-19 tàm tiah do dê. Ală mpồl lơh broă ai tai mpồl ling gròi sền tàm tiah nhàr lơgar mờ kung ai tai phan bơna, rơndeh rơndồ, măy mok, sơnơm tơm ba gah lơh sơnơm in tus bal rcang sơndră kòp.

Bơh tiah kòp tàm quận Gò Vấp, ƀòn dờng Hồ Chí Minh rê tàm hìu tàm kơnhoàl  Đức Cơ, càr Gia Lai, bơh lồi nhai 7 tus tŭ do, bi Hồ Hữu Trung (deh nam 1998) geh dờp ai mut ơm tàm tiah ai ơm yah ngài tơrgùm bal bơh Gah đơng lam ling klàng càr Gia Lai dê. Bi Trung pà gĭt, ală jơnau sồr rcang sơndră kòp tàm do geh tơl nă cau lơh jat niam ngan den gơ lơh iang nùs ngan. Bi Trung đơs:

Ală cau ling, ală bác sĩ tàm Sư đoàn drơng broă jơh nùs ngan, sền gròi rài kis oh mi in. Bè broă lơh kloh niam tiah ơm kis, tàm dơlam mờ bơdìh ndrờm geh lơh niam, broă sào sa gàr tơl bơta kloh niam mờ ờdo ờdă phan ngui sa. Añ neh geh xét nghiệm 3 dơ̆, ndrờm ờ bơtờp kòp. Añ ala mat jơh ală làng bol ơm yah ngài, ưn ngài ală Kuang bàng, cau ling, bác sĩ tàm do neh jơh nùs, niam ngan, sền gròi bol añ in.

Ală bác sĩ ling klàng kham pràn kơl dang să jan pah ngai ai làng bol tàm tiah ai ơm yah ngài in

Bơh bồ nam tus tŭ do, Gah đơng lam ling klàng càr Gia Lai neh bơyai lơh ai ơm yah ngài ai rlau 13 rơbô 500 nă làng bol. Tŭ do, tàm 33 anih lơh broă gơwèt mpồl ling dê, gam geh rlau 6 rơbô 700 nă làng bol lơh jat broă lơh ai ơm yah ngài. Nàng broă lơh ai ơm yah ngài gàr niam bơta ờdo ờdă, rcang sơndră broă tàm bơtờp kòp.

Gah đơng lam ling klàng càr dê neh jàu kơnòl broă ai Phòng rcang lài broă lơh in, hơ̆ là Mpồl quân y rcang lài tơl làm tơn phan bơna, măy mok, sơnơm tơmba, rơndeh rơndồ kỹ thuật, mpồl ling tus bal rcang sơndră kòp. Bơdìh hơ̆, mpồl ling rcang lài pơgồp bal mờ Mpồl ling sền gàr tiah nhàr lơgar càr dê mblàng yal mờ lơh jat ală broă rcang sơndră kòp, tơrmù ƀà bơta bơtờp kòp uă tàm mpồl bơtiàn; ai 78 nă Kuang bàng, cau ling, ling giăp ƀòn pơgồp bal mờ ală pôs đồng ling sền gàr tiah nhàr lơgar bơyai lơh broă lòt sền tiah nhàr lơgar, kơryan broă mut mờ lik bơh tàm lơgar tìs mờ kơrnoat boh lam, mblàng yal bè broă rcang sơndră kòp

Trung tá Lê Hồng Tuấn, Kuang atbồ Pôs đồng ling sền gàr tiah nhàr lơgar Ia Chía, Mpồl ling sền gàr tiah nhàr lơgar càr Gia Lai dê pà gĭt: Mpồl ling atbồ rlau 7 kơi sồ gùng tiah nhàr lơgar, ai 2 mpồl ơm gak, tơl mpồl geh bơh 5 tus 7 nă cau, tàm hơ̆ geh 4 nă Kuang bàng ling klàng dê geh ai bơh Gah đơng lam ling klàng càr Gia Lai. Kuang bàng, cau ling sùm lơh broă, lòt sền tiah nhàr lơgar, jơh nùs lơh ngan kơryan ală cau mut mờ lik bơh tàm lơgar tìs mờ kơrnoat boh lam; rcang lài sền gĭt ù tiah, pơgồp bal mờ ală tiah kờp sền, sền gŏ rlau 1 rơbô nă làng bol bơh ală tiah ndai rê, lam lơh jat ală broă lơh yal mờ gah lơh sơnơm, kham sac rơ wah.

Đại tá Huỳnh Việt Dũng, Phó Gah đơng lam ling klàng càr Gia Lai pà gĭt, Gah đơng lam ling klàng càr dê neh ai gĭt nđờ rơhiang nă kuang bàng, cau ling mờ mpồl ling griăp ƀòn lơh jat broă lơh dờp, lơh kloh tiah ơm kis, lơh kloh khuẩn mờ dong kờl tàm tiah ai ơm yah ngài gàr niam broă lơh rcang sơndră kòp.  Đại tá Huỳnh Việt Dũng đơs:

Tŭ do, bol añ pơgồp bal mờ ală gah, sơnah lơh broă rcang lài tơl làm ală broă lơh niam ngan bơh broă ai rơndeh kuang àng pơlam gùng lòt tus tàm tiah ai mẫu kòp di mờ jơnau sồr bơh Bộ Y tế dê gàr niam broă ờ tàm bơtờp kòp, lơh roh bơta ờdo ờdă tàm tiah ai ơm yah ngài.

Mpồl ling dờp phan ngui sa, gàr niam broă dong kờl ai ală tiah ai ơm yah ngài in

Bal mờ Gah đơng lam ling klàng càr Gia Lai, tàm jơh 2 dơ̆ bơtờp kòp tàm càr bơh bồ nam tus tŭ do, Tiểu đoàn Hoá học (gơwèt Bộ Tham mưu) mờ mpồl y học rcang lài (gơwèt Cục Hậu cần) gơwèt Quân đoàn 3 (Bộ Quốc phòng) bơyai lơh tơn broă ƀồm sơnơm lơh kloh khuẩn tàm ală tiah kòp tàm thị xã Ayun Pa, kơnhoàl Ia Pa, ƀòn dờng Pleiku. Đại úy Phạm Văn Hùng, Tiểu đoàn trưởng Tiểu đoàn D30, Cục Kỹ thuật, Quân đoàn 3 dê pà gĭt: bơh nhai 7 tus tŭ do, nàng kờñ dong ală tiah tơrmù ƀà bơta kơn jơ̆ kơn jŭt tàm tiah ai ơm yah ngài tŭ làng bol bơh ală càr tiah đah Jum dà lơgar rê nàng pleh kòp, ală Kuang bàng, cau ling neh lời wơl pôs đồng, bơyai lơh ai ơm yah ngài ai 500 nă làng bol in. Đại úy Phạm Văn Hùng đơs:

Bol añ rcang lài niam ngan phan bơna, dờp làng bol jat bơta tơrgùm dùl nùs bal bơh tiah do dê. Tiểu đoàn tơnơ̆ tŭ lòt tus tiah ơm pa, bol añ sơr băc mhar kơ̆ kơl jap mpồl lơh broă, bơyai ai tiah sào sa, tiah ơm rlô pa, gàr niam bơta geh ngan, lơh sir kơnòl broă dơ̆ lĕ bal hơ̆ là rcang sơndră kòp, mờ kung lơh sir ală broă jàu broă rơndap lơh, kơnòl broă ờs mờng kỹ thuật.

Lơh jat jơnau sồr bơh Quân khu 5, Gah đơng lam ling klàng càr Gia Lai dê neh pơgồp tơn lòt sền 4 tiah tàm ù tiah càr dê nàng lơh hìu sơnơm ing nàng sơm kòp ai cau kòp Covid-19 in. Jat hơ̆, mpồl neh sac rơwah Hìu bơsram Cao đẳng Gia Lai lơh Hìu sơnơm ing nàng sơm kòp ai cau kòp Covid-19 in tàm khà nggờc, gơwèt Gah đơng lam ling klàng càr Gia Lai dê. Bal mờ gàr niam phan bơna, tàm  bơta măy mok, sơnơm tơmba, hìu sơnơm geh mpồl Kuang bàng, cau lơh broă là Kuang bàng gah lơh sơnơm bơh ală mpồl ling klàng dê lơh pôs đồng tàm ù tiah càr Gia Lai.

Mờ nùs nhơm lam lài, jơh ală bơta là tài bơh bơta ờdo ờdă, pràn kơl dang să jan bơh làng bol dê, ală mpồl ling klàng bơh Quân khu 5 mờ Quân đoàn 3 (gơwèt Bộ Quốc phòng) tàm càr Gia Lai dê gam geh uă broă lơh geh cồng nha, ngan ngồn gơ gơs là dùl tàm ală mpồl ling tờm tàm tiah lam lài sơndră kòp Covid-19 tàm tiah do dê.

 Jat VOV Tây Nguyên- Cau mblàng K’Hạnh