VOV4.K’ho- Tơnơ\ 2 nam lam lơh, broă lơh jat Chỉ thị sồ 05 bơh Bộ Chính trị dê bè “Lơh pràn bơsram mờ lơh jat nùs nhơm bồ tơngoh, rài kis mờ broă lơh jak Bác Hồ dê”, càr Dak Lak neh lơh geh ală cồng nha pal cih dờp ngan, gơ gơs là srơh tàm pơrlòng làm uă mờ geh bơta pràn lơh gơrề pràn ngan tàm jơh gùt càr.

Sươn chi tơlir, kloh, niam. Bơh tiah nggui ơm kơ\p geh kham kòp tus sơm kòp tàm hìu sơnơm geh rơndăp tăp sèng dipal ngan. Cau lơh broă sơnơm wa\ rò rềp mềl sơrmah sơrmài ngan dong cau kòp sùm gơlơh niam ngan tàm nùs, iang nùs ngan pah tu\ lòt tus kham kòp…

Hơ\ là jơnau đơs bal bơh cau kòp mờ cau hìu bơnhă cau kòp dê pah tu\ tus kham mờ sơm kòp tàm Hìu sơnơm kơnhoàl Cư\ Mgar, càr Dak Lak. Là cau kòp sùm bơh hìu sơnơm dê tài bơh bơta kòp plai nùs mờ huyết áp, ồng Mai Văn Vượng, ơm tàm thôn 6, xã Quảng Phú gơlơh niam nùs ngan tu\ lòt tus sơm kòp tàm do. Ală cau lơh sơnơm ờ mìng kham sền bơta pràn kơldang să jan bơh cau kòp dê lơm gời ờ mờ gam còp să, pơndờm pơnđiang tơl nă cau nàng khi in pin dờn mờ iang nùs sơm kòp.

“A` gơtìp kòp nùs mờ gơtìp tai kòp klờm soh mờ bơsiă, a` sơm kòp tàm do neh 4 nam do. Tàm do, sơnơm tơm ba wil tơl, ală cau lơh sơnơm boh bơr niam ngan mờ sơrmah sơrmài ngan dong he chờ hờp nàng sơm kòp”.

Jat Bác sĩ Châu Đương, Giám đốc Hìu sơnơm kơnhoàl Cư\ Mgar, càr Dak Lak yal, ală bơta gơ tam gơl do lơh geh dùl bơnah là tài bơh tu\ hìu sơnơm lam lơh jat chỉ thị sồ 05 bơh Bộ Chính trị dê bè “Bơsram mờ lơh jat nùs nhơm, bồ tơngoh rài kis mờ broă lơh jak bơh Bác Hồ dê”.

Bơta lơh ngan bơh tơl nă kuang bàng, cau geh đảng dê, tàm hơ\ bơta lam lài lơh krơh bơh cau atbồ dê geh lơh uă, neh lơh gơdan nùs nhơm lơh ngan bơh tơl nă kuang bàng, cau geh đảng mờ cau lơh broă sơnơm tàm hìu sơnơm dê.

Bơh srơh do, 100% cau geh đảng neh cih mat is mờ lơh jat geh cồng nha tơngume bơsram. Ală phòng ban neh lơh niam wơl nùs nhơm, broă lơh, tu\ jiơ lơh broă dùl bă niam bơne\ ngan.

Nùs nhơm drơng cau kòp in sùm geh sền dờng màng ngan. Kuơmàng là sùm ai bơta niam nùs bơh cau kòp dê là jơnau nàng kờp gi\t cồng nha bơsram mờ lơh jat nùs nhơm bồ tơngoh, rài kis mờ broă lơh jak Bác Hồ dê.

Tàm mpồl cau wa\ mờ jàu cồng nha bè sră nggal hành chính bơh UBND xã Hoà Thắng, [òn dờng Buôn Ma Thuột dê, pah ngai geh bơh 100- 120 nă cau tus lơh sră nggal. Mơya, cau lơi cau hơ\ kung chờ hờp chờ hờn lơm drơng broă làng bol in bơh kuang bàng bơto pơlam lơh sră nggal dê.

Dilah bè lài do, thùng sră tă pơgồp jơnau đơs geh ơn tàm hìu duh broă Ủy ban Nhân dân xã dê, pah nhai dờp geh pơgăp 50 jơnau đơs lah bè nùs nhơm lơh broă, tu\ tơngai bơsong broă bơh kuang bàng công chức dê, den tu\ do jơnau do ờ gam tai.

Jat ồng Nguyễn Khắc Long, Kuang atbồ Ban Tuyên giáo Thành ủy Buôn Ma Thuột, càr Dak Lak yal, nàng làng bol niam nùs, pin dờn tàm ală kấp gơnoar atbồ, tơl nă kuang bàng công nhân viên chức tàm ală anih lơh broă, mpồl cau neh sền broă bơsram mờ lơh jat Bác Hồ gơ gơs là kơnòl broă sùm gơ jat bal mờ kơnòl broă bơh anih lơh broă, mpồl lơh broă dê.

Ờ mìng tàm Ủy ban Nhân dân xã Hoà Thắng dê lơm mờ jơh bal ală xã, sơnah [òn bơh [òn dờng Buôn Ma Thuột dê tai ndrờm lơh jat niam chỉ thị sồ 05 bơh Bộ Chính trị dê.

Kuơmàng tơngo\ tàm nùs nhơm geh kơnòl, lơh krơh lam lài, nùs nhơm lơh broă rềp mềl mờ làng bol, sền dờng màng làng bol, tài bơh làng bol drơng broă…bơh uă kuang bàng, cau geh đảng dê ngan là kuang bàng dờng màng dê neh pơgồp bơnah bơsong jơh uă dơ\ broă pơneh ờ niam, kal ke, tơnguh uă pràn jak tàm pơrlòng, pơgồp bơnah lơh geh ală jơnau sồr bơtàu tơnguh lơh sa- mpồl bơtiàn tàm bàr pe tiah mờ anih lơh broă dê. 

“Mờ gơnoar broă lam lài lơh krơh niam bơh kuang bàng tờm dê, neh geh tơngo\ loh làng hơ\ là nùs nhơm lơh broă rềp mềl mờ [òn lơgar mờ sùm tam tìp mờ làng bol tàm [òn lơgar gơ wèt mờ thành ủy geh jơnau sồr pe nhai dùl dơ\ kuang bàng tờm mờ ală mpồl đảng gơ wèt bal pal bơyai lơh tìp mat cribơyai mờ làng bol nàng tơrgùm bơsong ală bơta kal ke nàng tă bơsong ală bơta mờ làng bol geh jơnau đơs nàng lơh geh jơnau kờ` drơng broă làng bol in mờ nùs nhơm niam ngan rlau jơh”.

Nàng pơn jat tai ngui niam cồng nha lơh geh bơh broă lơh jat Chỉ thị sồ 05 bơh Bộ Chính trị dê bè “Lơh pràn bơsram mờ lơh jat nùs nhơm, bồ tơngoh, rài kis mờ broă lơh jak Bác Hồ dê”, ồng Phạm Minh Tấn, Phó bí thư thường trực tỉnh ủy Dak Lak pà gi\t, Ban Thường vụ Tỉnh ủy sồr ală kấp ủy, ală tiah, ală anih lơh broă tơrgùm lơh pràn mblàng yal, rề ơnàng lơh uă ală broă lơh, cau gơguh jak, cau pơnrơ tàm broă bơsram mờ lơh jat nùs nhơm, bồ tơngoh, rài kis mờ broă lơh jak Bác Hồ dê gơ jat bal mờ broă lơh jat kơnòl broă chính trị, kơnòl broă bơtàu tơnguh lơh sa- mpồl bơtiàn, sền gàr dà lơgar, bơta lơngăp lơngai tàm [òn lơgar…

“Thường vụ tỉnh ủy Dak Lak sùm sền tàm jơh gùt Đảng bộ, broă bơsram mờ lơh jat Chỉ thị sồ 05 là broă lơh sùm gơ wèt tus mờ jơh gùt Đảng bộ, gơ wèt mờ tơl nă kuang bàng, cau geh đảng, công chức, viên chức mờ cau lơh broă.

Gơ wèt mờ tơl nă kuang bàng, cau geh đảng broă bơsram tơngume chỉ thị gơ jat bal mờ broă lơh jat  Nghị quyết dà lơgar 4 khoá 11, Nghị quyết Dà lơgar 4 khoá 12 bè broă lơh bơ\t bơtàu Đảng tam dră lơh gơlik is bè nùs nhơm bồ tơngoh, rài kis, tam dră lơh gơlik is lơh tam gơl is tàm dơlam mpồl.

Lơh jat chỉ thị sồ 27 bơh Chính phủ dê bè tơnguh jơnhoa nùs nhơm bồ tơngoh tàm broă lơh broă dà lơgar dê ai kuang bàng, công nhân, viên chức in. Kuơmàng là lơh jat chỉ thị sồ 05 jat jơnau bơto sồr bơh Bác Hồ dê nàng lam lơh jat Nghị quyết dà lơgar 7 bè broă lơh kuang bàng tàm tơngai mờr tus”.

Bơh broă jơh nùs bơsram mờ lơh jat Bác Hồ gơ jat bal mờ kơnòl broă chính trị bơh [òn lơgar dê jat Chỉ thị sồ 05 bơh Bộ Chính trị dê neh lơh geh dơ\ cribơyai chính trị làm uă tàm ù tiah càr Dak Lak dê.

Bơh ală broă lơh, broă lơh geh kuơ, ngan ngồn neh lơh geh bơta lơh gơ rề tàm jơh gùt mpồl bơtiàn, ai srơh tàm pơrlòng bơsram mờ lơh jat Bác Hồ gơ gơs là broă lơh sùm mờ lơh jat is!

Cau mblàng Lơ Mu K’Yến