VOV4.K’ho- Ală tiah bañ sền ờ sơp, rơcang lài ală jơnau digơlan gơlik geh tŭ geh kòp Covid-19 tàm tiah he dê. Do là jơnau đơs nền bơh Bộ trưởng Bộ Y tế, ồng Nguyễn Thanh Long tàm pơrjum pờ tơlik tơn tàm internet “Sơlơ tơnguh broă lơh rơcang sơndră kòp Covid-19” mờ 63 càr, ƀòn dờng geh lơh drim ngai 16/4. Đơs mut pơrjum, Bộ trưởng Bộ Y tế, ồng Nguyễn Thanh Long đơs nền: Kòp Covid-19 kung gam gơlik geh kal ke tàm dunia, broă sền gròi kòp tàm nam do là bơta lòng dờng ngan gơ wèt tus mờ jơh ală lơgar mờ jơh bal lơgar Việt Nam dê.

Jat Bộ trưởng Bộ Y tế đơs, lơgar he neh lòt gan 3 dơ̆ gơbàn kòp, tus tŭ do neh 21 ngai lơgar he ờ geh cau bơtờp kòp Covid-19 tàm mpồl bơtiàn, ală broă lơh bơh làng bol dê ndrờm bè gơ rê bè ờs wơl. Bơh ală dơ̆ gơbàn kòp neh ai geh uă jơnau mờng chài nàng sền gròi niam kòp Covid-19. Bộ trưởng Nguyễn Thanh Long đơs nền: Tiah pơhìn uă ngan rlau jơh tŭ do là tiah nhàr đah jum mat tơngai mut mờ ală càr tiah đah jum mat tơngai mut dà lơgar, den tàng, ală càr pal sơlơ sền gròi gùng nhàr dà lơgar. Bộ Y tế neh pơgồp bal mờ Bộ Quốc phòng sơlơ tơnguh ală mpồl lơh broă tus ală anih sền gròi tàm tiah nhàr dà lơgar.

Cau mblàng K’Duẩn