VOV4.K’ho- Tàm dơ̆ bơtờp kòp Covid-19 dơ̆ 4 do, neh geh gĭt nđờ rơhiang nă Kuang bàng, cau ling lơh sơnơm lòt gùng dong kờl ai ală tiah kòp tàm tiah đah Jum dà lơgar dê in. “Jơh kòp hơ̆ sồng rê wơl” hơ̆ là jơnau đơs ngan bơh Kuang bàng ling klàng lơh sơnơm dê tàm dơ̆ sơndră mờ kòp tŭ mut tàm broă lơh ờ geh sap ntas phàu dê.  Ală cau lơh băo Anih jơnau đơs Việt Nam dê neh cih wơl nùs nhơm mờ jơnau kơlôi sơnơng bơh ală Kuang bàng, y, bác sĩ dê lài mờ tŭ jiơ lòt gùng mut tàm càr tiah đah Jum dà lơgar dong kờl mpồl cau lơh broă ai hìu sơnơm ing tàm ƀòn dờng Hồ Chí Minh dê.

100 nă bác sỹ, cau lơh sơnơm, cau tus bơh Học viện Quân y, cau tus bơh Hìu sơnơm Quân y 7, Hìu sơnơm Quân y 103 mờ Viện  Y học cổ truyền ling klàng, bơh àng drim gờñ neh geh mat tàm tiah tơrgùm bal Lữ đoàn Vận tải 971 Sóc Sơn nàng rcang lòt gùng. Jơh ală cau do ndrờm dùl dà phan soh tus bal dong kờl tàm hìu sơnơm ing, dùl nơm sàc bal hiă àñ tàm pơnì, hơ̆ là jơh ală phan cèng bal tŭ lòt sơndră kòp.

Lài mờ tŭ lòt gùng tàm ală tiah đah Jum dà lơgar lơh jat kơnòl broă, ală cau ling ling klàng lơh sơnơm mìng di tŭ hòi điện thoại ai hìu bơnhă in dùl ết gời lơm. Tài bơh dờp jơnau sồr mhar tàm tŭ nggùl mang àng drim gờñ ngai tơnơ̆ pal lòt gùng mut tàm ƀòn dờng Hồ Chí Minh, ală Kuang bàng, cau ling lơh sơnơm rcang phan bơna tàm tŭ jiơ ơm lơh broă, ờ thàn rê tàm hìu. Geh tŭ ùr Thiếu tá Nguyễn Thị Kiên – Hìu sơnơm Quân y 7 ờ hềt thàn yal mờ hìu bơnhă sơl.

Bơklau añ den ờ hềt gĭt sơl, tài bơh oh dờp kơrnoat tàm mang, oh ờ hềt thàn yal, bơklau oh neh lòt lơh broă bloh, bơklau oh kung là mpồl ling phàu crong sơl, bơklau oh là Kuang àng.

Ală cau ling lơh sơnơm dờp kơrnoat lài mờ tŭ jiơ lòt gùng

Dơ̆ lòt lơh broă nisơna do digơlan là 15 ngai mờ digơlan là jŏ rlau tai sơl, ờ cau lơi lùp ngai rê, tài bơh khà cau kòp kung gam gơguh uă, mờ mpồl ling bal lòt lài kung gam lơh ngan sơm kòp ai cau kòp tàm ală hìu sơnơm ing in tàm uă poh do mờ bơta kal ke uă ngan mờ trồ tiah duh trơ ồl, mơya cau ling kung kơ̆ nùs ơm lơh broă tam dră mờ kòp nàng kơryan kòp. Mờ khi gĭt wă là neh soh tàm să he dê 2 dà ào cau ling, bác sĩ den ală tŭ bòl glar kal ke, bơta pơhìn bơh kòp dê, rlau mờ tŭ lơi jơh do là tŭ mờ làng bol kờñ geh bơta dong kờl, dà lơgar kờñ tus mờ bơta tă pơgồp bal bơh ală cau ling dê. Tàm nùs nhơm kơ̆p kờñ sơr băc mhar mut tàm tiah kòp, Đại úy, bác sỹ Đặng Văn Ba khoa hồi sức nội, Hìu sơnơm Quân y 103, đơs.

Sền gŏ tàm ală gah mblàng yal mờ ală oh mi lơh broă bal tàm hơ̆ pà gĭt là khà cau kòp F0, ngan là khà cau kòp F0 kơn jơ̆ uă ngan, să tờm añ kung kờñ tus bal ngan, kờñ ngan geh mut bal tàm hơ̆ nàng dong kờl, nàng dong bal ală oh mi lơh sơnơm, dong kờl ai cau kòp in bơnah lơi di bơnah hơ̆.

Sền gĭt loh do là kơnòl broă tam dră tàm rài lơngap lơngai, kờp bal mờ ală cau bơsram dờng kơnòm să bè Trung sỹ Phạm Công Kim, cau bơsram dờng Học viện Quân y kung rcang lài tă pơgồp bal dà kơl hề bơh he dê mờ sền gĭt loh kơnòl broă tŭ geh ai lòt dong kờl hìu sơmơm ing tàm ƀòn dờng Hồ Chí Minh dê.

Bol añ geh pơlam tàp 3 dơ̆ bloh, pơlam tàp bè ală bơta chài ai mẫu kòp kung bè là sền gĭt mẫu xét nghiệm, bol añ gơtùi drơng broă bè gah xét nghiệm ai broă lơh sơndră kòp, mờ broă lơh điều dưỡng bol añ kung lơh gơtùi sơl.

Thiếu tá Đỗ Mai Phương, Hìu sơnơm Quân y 7 tus bal dong kờl is tàm ƀòn dờng Hồ Chính Minh sơndră kòp

Lời wơl bơh ngkời là pơ ùr, là bơklau, là kòn, là mè bèp kra, mơya hìu bơnhă bơh cau ling dê sùm sền dờng màng, gĭt wă broă lơh bơh cau ling geh griăt dê, nàng jơh nùs jơh tồr lơh broă tàm tiah lam lài gam kờñ ngan kờñ geh bơta dong kờl bơh oh kòn khi dê. Kơnờm bơh hơ̆ ală cau ling iang nùs, jơh nùs lòt gùng bulah gam geh ală bơta kal ke uă bơta. Ngan là gơwèt mờ ală hìu bơnhă jơh bal ùr bơklau ndrờm lơh broă tàm mpồl ling phàu crong mờ ndrờm là cau lơh broă tàm tiah lam lài sơndră kòp. Điều dưỡng quân y Nguyễn Thị Kiên pà gĭt:

Dùl nă sau bơsram ơdŭ 10, dùl nă sau bơsram ơdŭ 4 mơya mè bèp sùm pal lơh broă jơh bal mờ trồ mang, bơklau oh tŭ do gam ơm tàm tiah ai ơm yah ngài, kơnòl broă atbồ tàm tiah ai ơm yah ngài den 2 nă sau geh bơsram tàp bơh jŏ bloh neh kuèng ngan mờ broă mè bèp ờ ơm tàm hìu den 2 nă oh mi tàm sồr bal bơsram sră, lơh broă tàm rài kis mờ broă sào sa.

Drờm bè hơ̆ sơl, Thiếu tá – Bác sĩ Đỗ Mai Phương kung lời 2 nă kòn dềt tàm hìu, oh mi tàm sền gròi bal, ai mè den mut tàm tiah đah Jum dà lơgar sơndră kòp mờ ờ duh pal kơlôi sơnơng uă bơta lơi.

Bàr nă oh mi ơm is tàm hìu, tàm sền tàm ròng bal, añ sền gĭt kơnòl broă bơh he dê là lòt gùng sơm bat tê bal, pơgồp bal bơta pràn sơndră kòp bal mờ làng bol tàm tiah đah Jum dà lơgar, sền gĭt loh kơnòl broă den ờ geh bơta lơi mờ kơlôi sơnơng ờ.

Lơh jat bơhiàn lơh ngan tam dră, lơh ngan jai pha bơh Ling klàng khin cha jak chài dê, mờ nùs nhơm jơh ală bơta tài làng bol tiah đah Jum dà lơgar pròc mhàm bal, mờ broă lơh “Sơn dră kòp bè là tam dră mờ bol sò tơm”, tam dră pràn rlau tai, kràñ cê jơh nùs rlau tai, sồr bol he pal lơh ngan jơh nùs uă rlau tai, rcang lài dờp mờ lơh sir jak ngan kơnòl broă. Lài hơ̆, Bộ Quốc phòng neh sồr anih lơh broă, mpồl lơh broă lam lơh crơng gơs 7 nơm hìu sơnơm ing tàm ală càr, ƀòn dờng tiah đah Jum dà lơgar dê mờ bơta pràn tơrgùm phan kòp mờ sơm kòp ai 3 rơbô 500 nă cau kòp in mờ rcang lài pờ ơnang, di pal mờ broă dờp tus 10 rơbô nă cau kòp.

Dơ̆ tàm tơngăc bơh ală cau ling, bác sĩ dê kung geh bơyai lơh krơi is ngan sơl, ờ geh cau pròc mhàm bal, mìng geh cau ling bal tàm kŭp tê bal mờ cau ling bal tàm ală bơta kal ke bơh gĭt nđờ rơbô nă cau kòp gam ơm kơ̆p. Khi lòt gùng dong kờl gĭt nđờ rơhiang nă Kuang bàng, y, bác sĩ ling klàng gam geh mat tàm 7 nơm hìu sơnơm ing bơh ling klàng dê crơng gơs tàm tiah kòp tàm ală càr tiah đah Jum dà lơgar dê, tiah gam sơm kòp ai gĭt nđờ rơbô nă cau kòp Covid-19 in mờ jơh nùs lơh ngan sền gàr màng kis, pràn kơl dang să jan ai làng bol in tài dùl ngai hìng ờ gam kòp tai.

Jat VOV1- Cau mblàng K’Hạnh