VOV4.K’ho- Drim ngai 20/8, tàm Anih kah kir Chủ tịch Tôn Đức Thắng, xã Mỹ Hòa Hưng, ƀòn dờng Long Xuyên, càr An Giang, Tỉnh ủy, Hội đồng Nhân dân, Ủy ban Nhân dân, Ủy ban Mặt trận dà lơgar Việt Nam càr An Giang neh bơyai lơh ơn guàng bơkàu, chu ñàng di tơngkah 133 nam ngai deh Chủ tịch Tôn Đức Thắng (20/8).

Bí thư Tỉnh ủy An Giang ơn guàng bơkàu kah kơlôi Chủ tịch Tôn Đức Thắng

Dơ̆ tơngkah 133 nam ngai deh Chủ tịch Tôn Đức Thắng nam do geh lơh tàm tŭ tơngai gùt lơgar đơs bal, càr An Giang đơs is gam lơh ngan rơcang sơndră kòp Covid-19, den tàng ală broă lam lơh geh lơh bal hiă lơm mơya gam cèng nùs nhơm ki ngàm; cau tus bal dơ̆ bơyai lơh pal lơh jat nền nòn ală jơnau sồr bè rơcang sơndră kòp. Pơn iờ să bè broă lơh mờ nùs nhơm kac màng sàng goh bơh Chủ tịch Tôn Đức Thắng dê, Đảng bộ mờ làng bol càr An Giang hơ pơrgon geh tam klac bal dùl nùs, lơh ngan bơsram, lơh broă, tơnguh nùs nhơm brồ guh is, tơnguh nùs nhơm ngac ngar, bơceh pa, ngui bơta pràn, ngui tŭ niam  mờ ală bơta ƀuơn ƀuài nàng bơt bơtàu càr An Giang ngai sơlơ bơtàu tơnguh, dipal là ƀòn tờm bơh Chủ tịch Tôn Đức Thắng dê.

Cau mblàng K’Duẩn