VOV4.K’ho - Mpồl kuang bàng, cau ai tơngit jơnau đơs bơh Anih jơnau đơs Việt Nam neh tus lơh broă nùs nhơm is tàm ală càr hờ đah jum tàm ală ngai ală càr hờ đah jum dà lơgar lơh ngan tam dră mờ kòp gơtờp. Ờ mìng là kơnòl mờ gơwèt tơl nă cau ai tơngit jơnau, cau lơh ƀăo tus bal mờ dơ̆ lơh broă do geh cèng bal broă lơh tờm, tŭ lơi kung rơcang tus tàm ală tiah lơi nàng yal mờ cau iăt rơjô in ală broă bơh dà lơgar bal mờ nùs nhơm lơh ngan bơh cau ai tơngit jơnau đơs Anih jơnau đơs Việt Nam dê:

Mpồl kuang bàng, cau ai tơngit jơnau đơs tus lòt lơh broă dơ̆ do geh 12 nă, lòt tus ƀòn dờng Hồ Chí Minh mờ ală càr hờ đah jum geh ồng Phạm Mạnh Hùng, Phó Kuang atbồ dờng Anih jơnau đơs Việt Nam lam bồ. Mpồl geh kơnòl tơnguh broă đơng lam, yal, lam sồr bè broă tam dră mờ kòp Covid-19 mờ ờ uă tơngu me geh pờ tàm ală anih yal tơngit Anih jơnau đơs Việt Nam dê.

Tus tơngăc mờ lam sồr mpồl kuang bàng, cau ai tơngit jơnau đơs lòt lơh broă tàm ală càr hờ đah jum, Kuang atbồ dờng Anih jơnau đơs Việt Nam ồng Đỗ Tiến Sỹ kơ̆p kờñ ală cau ai tơngih jơnau, cau sền sơwì jơnau tơmù ală kal ke bè rài kis hìu nhă, rài kis broă lơh sa, bal mờ ală mpồl lơh broă tàm tiah sơnrờp tam dră mờ kòp gơtờp, tam pà bal mờ ală kal ke mờ làng bol, mờ oh mi lơh broă bal nàng pơgồp bal tàm broă lơh geh jăt jơnau kờñ dờng màng ngan là tơmù mờ kơrian geh kòp gơtờp.

Kuang atbồ dờng Anih jơnau đơs Việt Nam kung tơlik nùs nhơm pơnyờ să bè ală kuang bàng, cau ai tơngit jơnau, kơ̆p kờñ cau ai tơngit jơnau lơh broă nùs nhơm dong kờl ờ mìng yal bè broă phi să, lơh ngan bơh uă làng bol, oh mi, mpồl lơh sơnơm, y bác sĩ, mpồl ling, kuang àng gam ngai kung bè mang phi să is ai dơ̆ tam dră mờ kòp gơtờp mờ gam geh tơrgùm broă lơh mờng chài nàng geh ală jơnau cih sră ƀăo di pal mờ bơta krơi is bơh dà lơgar dê: “Mpồl kuang bàng lơh broă nùs nhơm dong kờl is là cèng jơnau nyal bơh Đảng ủy Anih jơnau đơs Việt Nam, do là broă lơh ngan bơh mpồl kuang đơng lam Anih jơnau đơs dê. Kung pin dờn ală oh mi gờñ geh jơnau cih sră ƀăo niam. Añ pin tàm broă lòt lơh broă do, ală oh mi geh lơh broă mờ tìp uă jơnau tơngit niam, uă bơta tàm rài kis, geh uă jơnau Anih jơnau đơs Việt Nam bal mờ anih lơh broă tờm yal tơngit in geh khà jơnau kuơ màng”.

Tàm dơ̆ pơrjum lòt lơh broă, ală cau ai tơngit jơnau đơs lòt lơh broă nùs nhơm is bơh Anih jơnau đơs Việt Nam ndrờm tơlik nùs nhơm tŭ lơi kung rơcang tus bal mờ ală mpồl lơh broă sơnrờp ngan, tus bal lam sồr bè kòp gơtờp. Kơ̆p kờñ geh uă jơnau tơngit, jơnau mblàng uă bơta niam bè dơ̆ rơcang sơndră mờ kòp gơtờp bơh dà lơgar dê. Cau ai tơngit jơnau Thành Lương, Ban Văn hoá, Xã hội (VOV2) đơs: “Bơta mờ añ kơ̆p kờñ ngan là gơwèt mờ cau iăt rơjô bơh Anih jơnau đơs Việt Nam, tŭ geh iăt jơnau bol añ cih. Iăt mờ sền ală rùp rài bol añ jào bơh tàm tiah gơtìp kòp den geh nùs nhơm pin dờn, kơ̆p gơn tàm rài tơnơ̆ do”.

Gam do là jơnau đơs bơh cau ai tơngih jơnau cau ùr Thi Uyên, Ƀăo điện tử Anih jơnau đơs Việt Nam (VOV.VN) dê: “Añ kơ̆p kờñ là añ geh cih ală jơnau yal mùl màl ngan bè dùl ƀòn dờng gam kis mờ tam dră mờ kòp gơtờp. Añ rơcang nùs nhơm bè rài tam lơh bơh ală mò ồng lài do dê. Kơ̆p kờñ să tờm geh sơrlèt mờ tơngai kal ke do mờ gơs cau geh sền gŏ bơta kal ke do”.

Cau mblàng Ndong Brawl