VOV4.K’ho- Mho ngai 31/8, tàm Anih tờm pờ tơlik jơnau đơs dà lơgar, hìu sồ 58, gùng Quán Sứ, ƀòn dờng Hà Nội, Anih Jơnau đơs Việt Nam bơyai lơh Dơ̆ ai mpồl kuang bàng, cau lơh ƀăo dan lòt lơh broă is tàm ală càr tiah đah jum dà lơgar. Mpồl kuang bàng, cau lơh ƀăo dan lòt lơh broă is dơ̆ do, geh 12 nă, lòt tus ƀòn dờng Hồ Chí Minh mờ ală càr tiah đah jum dà lơgar bơh ồng Phạm Mạnh Hùng- Phó Kuang ătbồ dờng Anih Jơnau đơs Việt Nam lơh kuang ătbồ mpồl.

Mpồl geh kơnòl broă sơlơ đơng lam, yal tơngĭt, mblàng yal bè broă lơh rơcăng sơndră kòp Covid-19 mờ bàr pe tơngume tàm ală gah mblàng yal jơnau bơh Anih Jơnau đơs Việt Nam. Tàm dơ̆ bơyai lơh ai cau lòt lơh broă, ală cau lơh ƀăo bơh Anih Jơnau đơs Việt Nam ndrờm tơlik nùs nhơm tus bal lòt bal mờ ală mpồl cau lơh broă tàm tiah lam lài, jơh nùs mblàng yal bè kòp bơtờp. Kơ̆p kờñ geh uă jơnau yal, măt sền uă gah ngan ngồn, loh làng bè broă lơh rơcăng sơndră kòp bơtờp bơh dà lơgar dê.

Cau mblàng Lơ Mu K’Yến