VOV4.K’ho- Nàng kờñ tam pà mờ làng bol geh rài kis kal ke tài gơ rềng bơh kòp Covid-19, Mpồl cau lơh sa kă bro kơnòm să càr Dăk Nông lam lơh “ATM phe 0 đông”, pà git nđờ jơt tấn phe ờ sa priă dong kờl làng bol. Ală ATM do gam pơn jat tai geh rề ơnàng tus ală tiah gơtìp gơ rềng tài bơh kòp Covid-19 tàm càr.

Pa ai 3 kĭ phe bơh “ATM phe 0 đông”, mò Trần Thị An, ơm kis ing tàm sơnah ƀòn Nghĩa Tân, ƀòn dờng Gia Nghĩa, càr Dăk Nông pà git, ƀòn tờm mò dê tàm Cần Thơ. Rài kis mò dê gam gơtìp uă ngan kal ke, mờ ƀòn tờm Cần Thơ kung gam gơtìp kòp bơtờp uă ngan sơl, ờ gơtùi dong kờl. Ngai do klo yal geh phàt phe ờ sa priă den tàng mò tus ai: “Añ bơh ƀòn tờm tus ndo ơm ơpah hơ̆ sồng lòt khòm phan sang nàng tac, nđờ ngai do kòp bơtờp uă ờ gơtùi lòt jòi. Kơnờm geh ală cau geh nùs nhơm niam pà phe kung geh piang sàu nđờ ngai do, añ ưn ngài uă ngan”.

ATM phe 0 đông bơh Mpồl cau lơh sa kă bro kơnòm să Dăk Nông lam lơh dong kờl cau kal ke

Ndrờm bè hơ̆ sơl, bi H’Nhung ơm tàm ƀòn Dăk Nur, sơnah ƀòn Nghĩa Đức, ƀòn dờng Gia Nghĩa pà git, hìu bơnhă bi geh 8 nă cau. Tài gơ rềng bơh kòp bơtờp den tàng tơl nă cau ờ gơtùi lòt lơh ơpah. Bơdìh hơ̆ tai, ală bơta plai chi bè bơ, sầu riêng ờ gơtùi tac lơh rài kis gơtìp uă ngan kal ke. Bè hơ̆ den tàng bulah mìng geh 3 kĭ phe bơh “ATM phe 0 đông” mơya kung lơh bi ram nùs sơl: “Hìu bơnhă añ dê uă ngan là lơh sa suơn sre den tàng phan bơna mờ ală bơta ndai gơtìp gơmù khà priă tac lơh rài kis pah ngai gơtìp uă kal ke. Kơnờm geh Đảng, dà lơgar, ală mpồl lơh broă, mpồl cau sền gròi dong kờl lam lơh “ATM phe 0 đông” den dong tơrmù kal ke tàm broă sàu sa pah ngai, tơrmù ƀà ală kal ke tàm rài kis pah ngai, kơlôi rơcang lòt jòi priă nàng blơi phe, làng bol chờ hờp ngan”.

Tơl nă cau lơh jat ală broă lơh rơcang sơndră kòp Covid-19 tŭ tus dờp phe

Mờ jơnau đơs cau lơi geh tus dờp, cau lơi kal ke tus ai, “ATM phe 0 đông” bơh mpồl cau lơh sa kă bro kơnòm să càr Dăk Nông lam lơh tơnơ̆ 4 ngai neh phàt geh rlau 6 tấn phe ai rlau 2 rbô dơ̆ cau geh rài kis kal ke tàm ƀòn dờng Gia Nghĩa in. Jat bi Nguyễn Ngọc Chính, Chủ tịch Mpồl cau lơh sa kă bro kơnòm să càr Dăk Nông đơs, bơdìh mờ phàt phe tàm ƀòn dờng Gia Nghĩa, “ATM phe 0 đông” geh lam lơh phàt phe ờ sa priă ai làng bol kal ke tàm ală kơnhoàl Dăk Rlâp, Tuy Đức mờ Dăk Glong in: “Ủy ban mpồl neh hòi jà tă pơgồp geh 30 tấn phe kờp priă 450 tơlak đông nàng phàt 4 anih in, dong làng bol gơtìp kal ke gàr niam rài kis tàm tơngai kòp bơ tờp. Bơdìh mờ 30 tấn do kờp dŭ sơrlèt rlau mờ khà bơh sơn rờp, bol hi geh hòi jà tă pơgồp tai 30 tấn phe tai, kờp jơh là 60 tấn phe nàng phàt làng bol ală tiah in”.

Cau mblàng K’Duẩn