VOV4.K’ho- Drim ngai 14/10, Ban Chấp hành Đảng bộ ƀòn dờng Hồ Chí Minh bơyai lơh pơrjum dơ̆ 9. Đơs mut pơrjum, ồng Nguyễn Văn Nên, Ủy viên Bộ Chính trị, Bí thư Thành ủy pà git, tàm 9 nhai nam 2021, broă gơlik geh bơta kòp bơtờp dê kal ke ngan, ƀòn dờng pal lơh jat broă ơm yah ngài mpồl bơtiàn tàm tơngai jŏ jòng.

Bơta do neh gơ rềng uă ngan tus rài lơh sa mờ niam chài, mpồl bơtiàn bơh ƀòn dờng dê. Jơh ală gah gơtìp gơ rềng, uă bơta khà gơtìp gơmù uă, tàm hơ̆ GRDP 9 nhai gơmù 4,98%. Tus tŭ do, ƀòn dờng Hồ Chí minh neh gơtùi sền gròi kòp. Bulah bè hơ̆, ƀòn dờng pal pơn jat tai lơh ngan uă rlau tai nàng lơh jat Nghị quyết sồ 128 bơh Chính phủ dê mờ jơnau pơlam bơh Bộ Y tế dê bè broă lơh ing gơ rờm bal ờdo ờdă, ngac ngar, gròi sền geh cồng nha kòp Covid-19. Pa do, Chủ tịch lơgar ồng Nguyễn Xuân Phúc neh đơs niam broă lơh ngan tàm broă lơh rơcang sơndră kòp mờ đơs tus ală bơta pal bơsong tàm tơngai tus.

Cau mblàng K’Duẩn