VOV4.K’ho - Drim òr (22/03), ồng Bùi Tuấn Quang, Phó kuang atbồ ban Dân vận Dà lơgar neh geh dơ̆ lơh broă mờ Thành ủy Pleiku, càr Gia Lai bè cồng nha lơh jăt jơnau đơs pơn dŭt sồ 120 bơh Bộ Chính trị bè pơn jăt tai chồl pràn, tơnguh uă bơta niam, geh cồng nha bơh broă bơ̆t bơtàu mờ lơh jăt kơrnoăt làng bol lơh tờm tàm ală tiah.

Tơngai do, cấp ủy, gơnoar atbồ, Mặt trận dà lơgar, ală mpồl lơh broă chính trị mpồl bơtiàn tàm ƀòn dờng Pleiku neh lơh jăt niam broă lơh jăt kơrnoăt làng bol lơh tờm tàm ală tiah. Tŭ do, 22 xã, sơnah ƀòn mờ ală anih lơh broă, mpồl lơh broă tàm ƀòn dờng neh pồ tơl kuang bàng mpồl đơng lam, tơlĭk kơrnoăt lơh broă mờ tam pà kơnòl broă lơh ai ală kuang bàng in di jăt kơrnoăt geh ai.

Đơs tàm dơ̆ pơn dŭt lơh broă, Phó kuang atbồ Ban Dân vận Dà lơgar ồng Bùi Tuấn Quang đơs tờm, tơngai tus, ƀòn dờng pal pơn jăt tai lơh jăt jơnau đơs pơn dŭt sồ 120 mờ ală sră nggal gơrềng bal bè broă lơh jăt kơrnoăt làng bol lơh tờm tàm ală tiah tơl niam, jrô ơnàng; chồl pràn broă lơh niam sră nggal, tàm hơ̆ uă ngan là broă wă làng bol mờ tơnguh broă cri bơyai mờ làng bol.

Cau mblàng Ndong Brawl