VOV4.K’ho- Mho ngai 24/03, ồng Dương Văn Trang Ủy viên Đảng Dà lơgar, Bí thư Tỉnh ủy Kon Tum đơng lam dơ̆ lơh broă mờ Mpồl lơh sa kă bro kơnòm să càr dê. Geh crơng gơs bơh nhai 12/2020, Mpồl lơh sa kă bro kơnòm să càr Kon Tum tŭ do geh 154 nă cau mờ 10 Chi hội, 11 Câu lạc bộ. Ală Chi hội, Câu lạc bộ neh ngui ală bơta pràn, bơta ƀuơn, ròng geh cồng nha đông trùng hạ thảo; tam, lơh gơlik, tăc geh cồng nha phan bơna prìt tiêu hồng; lơh gơlik mờ tăc ală phan bơna bơh kơphê; lơh gơlik, bơtàu tơnguh ală phan kir sơnrai pơn rơ ngan. Mpồl lơh sa kă bro kơnòm să càr Kon Tum kung neh bơyai lơh uă broă lơh sền gàr tơl niam rài kis mpồl bơtiàn, dong kờl ală cau geh rài kis kal ke mờ kờp jơh khà priă rlau 160 tơlak đong.

Bí thư Tỉnh ủy Kon Tum đơs tàm dơ̆ lơh broă

Đơs tàm dơ̆ lơh broă, Bí thư Tỉnh ủy Kon Tum pin dờn ală mpồl cau lơh sa kă bro, mpồl lơh sa kă bro kơnòm să geh jòi geh gùng dà pa nàng ngui niam 2 bơta pràn, bơta ƀuơn dờng ngan bơh càr dê, hơ̆ là: nhơl chờ mờ phan lơh sơnơm. Tơngai tus, mpồl lơh sa kă bro càr pal lơh ngan pờ ơnàng broă lơh sa kă bro, tơnguh broă lơh bal mờ mpồl lơh sa kă bro càr gơ̆p bơyô bal nàng bơtàu tơnguh lơh gơlik phan bơna, ngan là lơh gơlik kơnuh sơnơm jriang, phan lơh bơh gah lơh sa sươn sre wèt tus tăc mờ lơgar ndai, lơh gơlik ală phan bơna pơn rơ ngan bơh càr Kon Tum dê.

Cau mblàng K’ Hạnh