VOV4.K’ho- Kơnòl chính trị bơh Binh đoan2 15 geh Chính phủ, Bộ Quốc phòng jào là: Tơnguh bơtaù broă lơh sa pơgồp bal mờ broă tơnguh sền gàr bơta lơngăp lơngai dà lơgar, bơ̆t bơtàu ƀòn lơgar mpồl bơtiàn tàm tiah kuơ màng Tây Nguyên.

Tơnơ̆ mờ rơlao 35 nam lơh broă, ală mpồl ling, mpồl lơh sa kă bro gơwèt Binh đoàn neh pơgồp bal nền nòn mờ 270 ƀòn bơh 33 xã, sơnah ƀòn, thị trấn gơwèt 4 càr: Gia Lai, Kon Tum, Bình Định, Quảng Bình. Bơdìh mờ broă lơh sa, kă bro geh cồng nha, ală mpồl ling sền sền gròi, drơng gàr rài kis cau lơh broă in

Xã tiah nhàr dà lơgar Ia Đal, kơnhoàl Ia H’ Drai, càr Kon Tum là tiah kal ke, geh gal làng bol kòn cau ơm kis. Mờ kơnòl tơnguh bơtàu broă lơh sa mpồl bơtiàn pơgồp bal mờ sền gàr kơl jăp bơta lơngăp lơngai dà lơgar, Binh đoàn 15 (gơwèt Bộ Quốc phòng) neh lơh Công ty 716.

 Binh đoàn 15 jào hìu (Tam klăc) ai công nhân in

Geh 12 mpồl lơh sa tàm công ty geh crơng gơs, tàm hơ̆ geh uă ngan cau lơh broă là làng bol kis tàm do. Bi Quách Công Quản là dùl tàm ală cau sơnrờp ngan geh Công ty 716 dờp ai lơh công nhân, priă geh rơlao 6 tơlăk đong tàm 1 nhai yal: “Bơh tŭ bol añ tus tàm do kung neh 7 nam, broă lơh nùs nhơm den kung ring niam. Tus tàm do lơh công nhân den gĭt là jŏ jòng, đềt mềr mờ công ty, geh ală bi tàm gơnoar atbồ kung bơto sồr, den lơh công nhân pơgồp bal mờ lơh broă sa den tàng rài kis kung ring niam”.

Mờ 35 nam lơh kơnòl bơ̆t bơtàu lơh sa mờ sền gàr kơl jăp bơta lơngăp lơngai dà lơgar tiah nhàr dà lơgar, Binh đoàn 15 neh lơh geh 44 rơbô lồ ù tam phan tàm tiah nhàr dà lơgar hờ đah tô Tây Nguyên, lơgar Lào mờ lơgar Campuchia. Nam lài, priă geh bơh công ty dê rơlao 2 rơbô tơmàn đong, ai broă lơh mờ priă geh ring niam sùm ai 17 rơbô nă cau lơh broă (tàm hơ̆ geh mờr 8 rơbô nă cau lơh broă là làng bol kòn cau). Ală công ty gơwèt bal neh lơh oh mi mờ 270 ƀòn; bơyai lơh ai rơlao 4 rơbô 600 hìu công nhân cau yoan lơh oh mi bal mờ hìu làng bol kòn cau.

Bơdìh hơ̆ tai, Binh đoàn kung lơh uă broă loơh bè hìu bơsram, hìu sơnơm; bơcri priă lơh pa gĭt nđờ rơhiang kơi sồ gùng che ồs đèng mờ gĭt nđờ rơbô kơi sồ gùng lòt. Ală broă lơh do neh pơgồp bal tàm broă dong kờl làng bol tơn jơh jơgloh tơmù rơƀah, bơ̆t bơtàu ƀòn lơgar pa, tơnguh bơtàu broă bơto bơtê mờ bơsram bal mờ lơh sơnơm tàm tiah do.

 Binh đoàn 15 dong kờl phe ai công nhân rơƀah bal mờ làng bol kòn cau in

Đại tá Trần Quang Song, Chủ nhiệm chính trị Binh đoàn 15 lài do là cau neh geh tŭ kis đềt mềr mờ jŏ nam mờ làng bol Tây Nguyên, den tàng geh uă jơnau kah wơl niam: “Kis đềt mềr mờ làng bol tàm Binh đoàn 15 geh uă bơta niam: Đềt mềr tàm rài kis, tàm broă lơh sa, tàm broă lơh gĭt gơ̆p mpồl bơtiàn; đềt mềr bơh rài kơnòm să, ơruh pơnu tus mờ tŭ kra mờ chơ̆t, sền gròi bal jơh tàm rài kis pin dờn, jăt yàng, jun bao, chơ̆t jê. Kơ̆p kờñ là Binh đoàn lơh geh niam uă rơlao tai bơhiàn niam bơnĕ do, pơn jăt tai lơh geh cồng nha ală kơnòl geh jào”.

Tàm ală nam do, mờ broă tam gơl ờ niam bơh drà kă bro phan geh lơh bơh broă lơh sa suơn sre, priă geh bơh cao su mờ kơphe ndrờm gơmù uă, mơya Binh đoàn 15 gam gàr niam rài kis bơh kuang bàng cau ling mờ cau lơh broă, ai geh bơta pràn nàng cau lơh broă đềt mềr mờ binh đoàn, iang nùs bơ̆t bơtàu ƀòn lơgar. Binh đoàn 15 lơh geh cồng nha ală broă lơh rài kis mpồl bơtiàn bè “Ling klàng tus bal bơ̆t bơtàu ƀòn lơgar pa”, “Ling klàng tus bal tài cau lơh ƀah”. Geh pơnrơ ngan, mờr 300 nơm hìu nùs nhơm, hìu tàm sơn đàc, hìu tam klăc geh lơh, rơlao 260 kơi sồ gùng lòt, 120 kơi sồ rơbòng dà geh lơh pa, lơh niam wơl. Gĭt nđờ rơhiang tấn phe geh jun tus hìu rơƀah tàm kàl puh pah.

Pa do ngan, di tŭ tus pơrjum tơnkah 35 nam ngai crơng gơs Binh đoàn 15, Thượng tướng Trần Đơn, Ủy viên Đảng dà lơgar, Thứ trưởng Bộ Quốc phòng neh dờp ală broă lơh ngan, bơceh lơh bơh kuang bàng, cau ling, cau sền gàr dà lơgar mờ cau lơh broă tàm Binh đoàn. Mờ sồr, binh đoàn pơn jăt tai lơh niam kơnòl pơgồp bal mờ cau lơh broă, tàm hơ̆ uă ngan là làng bol kòn cau. “Binh đoàn 15 pal pơn jăt tai gùng dà broă lơh Binh đoàn pơgồp bal mờ càr, kơnhoàl; công ty pơgồp bal mờ kơnhoàl, xã; mpồl lơh broă pơgồp bal mờ ƀòn lơgar; hiù cau yoan pơgồp bal mờ hìu cau kòn cau; tam klăc bal, đềt mềr bal mờ cấp ủy, gơnoar atbồ, làng bol ƀòn lơgar. Kuơ màng là pal rơcang mờ bơyai lơh niam Pơrjum dờng đảng ală cấp wèt tus pơrjum dờng dơ̆ 13 Đảng dê; kơlôi sơnơng ală bơta geh bơh ù tiah tàm do, bơh tŭ hơ̆ bơ̆t bơtàu rơndăp broă nghị quyết pơrjum dờng mờ ai rơndăp broă lơh sa kă bro di pal”.

Tàm pơrjum dờng dơ̆ 8, tơngai lơh broă bơh nam 2020 tus 2025, Đảng bộ Binh đoàn 15 neh ai tàm tơngai tus geh lơh jăt ală rơndăp broă pơgồp bal lơh sa kă bro, pơgồp bal lơh, lơh niam wơl broă lơh sa jăt broă geh uă bơta broă lơh sa kă bro, tơnguh uă bơta niam phan geh lơh di pal mờ broă kờñ pờ ơnàng dà kă bro. Tơngu me priă lơh geh tàm broă lơh sa geh 9 rơbô 800 tơmàn đong, priă geh 8 rơbô 700 tơmàn đong.

Cau mblàng Ndong Brawl