VOV4.K’ho- Nàng kờñ gàr niam bơta ờdo ờdă ai cau lơh broă in tềng đap bơta gơlik geh kal ke bơh kòp dờng Covid-19, Binh đoàn 15 neh sơnđờm mut ngui ală broă lơh rcang sơndră kòp mờ jơnau đơs “Sơndră kòp be là tam dră mờ bol sò tơm”. Bơdìh hơ̆, bơdìh mờ broă gàr niam broă lơh sa, kă bro gơtìp lơyài, mpồl neh sền gròi, lơh jat uă broă lơh sền gròi tus rài kis cau công nhân mờ cau lơh broă in.

Pah dơ̆ tus 11 jiơ klo ngai pah ngai, tiah tơrgùm bơsơ̆t kao su bơh Đội 2, Công ty 72, kơnhoàl Đức Cơ, càr Gia Lai, Binh đoàn 15 den hô hơng ngan săp đơs, săp nhơl ñŏ bơh ală cau còr bơsơ̆t kao su dê rê wơl. Khi chờ hờp tài bơh tơnơ̆ dùl mang bòl glar ngan, bơsơ̆t còr geh uă mờ geh bơta niam ngan. Tàm tŭ lơh broă, tơl nă công nhân kung sùm gĭt wă broă pơn chèu glòm muh mat, đo was să jan mờ ơm yah ngài tŭ jàu bơsơ̆t kao su, ală bơta mờng kuèng sồr bol khi tàm tŭ kòp Covid-19 bơtờp. Bi Siu H’Yien, công nhân còr bơsơ̆t kao su Đội 2, Công ty 72, (kơnhoàl Đức Cơ, càr Gia Lai) Binh đoàn 15 đơs :

Tàm do jơh bal oh mi lơh công nhân lơh jat niam tàm broă rcang sơndră kòp, ờ khat lòt rê mờ lơh broă sùm pal ơm yah ngài 2 thơk, mìng is hìu bơnhă geh 6 nă cau lơh công nhân mơya bol añ sùm lơh jat tàm broă lơh rcang sơndră kòp tŭ ơm tàm hìu mờ tŭ lòt lơh broă sơl.

 Ală kuang bàng, công nhân bơh Binh đoàn 15 dê sùm lơh jat broă lơh rcang sơndră kòp tàm tŭ lơh broă

Tàm ală anih lơh broă, xí nghiệp lơh gơlik bơsơ̆t kao su, Binh đoàn 15 gàr niam sùm lơh broă geh cồng nha mờ jơnau kờñ ờdo ờdă tàm broă lơh gơlik. Gơwèt mờ dùl xí nghịêp lơh gơlik phan, bè ờs geh bơh 25 tus 30 nă cau lơh broă mơya tŭ do mìng geh bơh 10 tus 15 nă cau lơh broă lơh broă tàm ala bal mờ gơ̆p nàng rcang sơnrdă kòp. Công nhân, cau lơh broă sào sa, ơm rlô tàm anih lơh broă tơn mờ tơl bơta geh gàr niam ngan. Thượng tá Phan Văn Phú, Phó Giám đốc Công ty 72, Binh đoàn 15 pà gĭt:

Tàm tơngai pa do den bal mờ mpồl lơh broă tàm ù tiah do dê, gàr niam kơ̆ kơljap bơta lơngap lơngai chính trị, rơndap tap sèng, ờdo ờdă mpồl bơtiàn, sền gàr lơngap lơngai ƀòn lơgar tàm ù tiah do dê. Bol añ sền gĭt là broă lơh rcang sơndră kòp, ờdo ờdă tàm mpồl lơh broă, rcang lài mpồl cau, rơndeh rơndồ, măy mok, dong kờl ală gah lơh broă  nàng gàr niam broă dong kờl ai ală mpồl cau, ală tiah, ală ù tiah geh kòp in. Bol añ sền gĭt tàm tơngai tus pơn jat tai gàr kơ̆, kơ̆ kơljap mpồl lơh broă, ù tiah lơh broă. Gàr niam broă lơh sa kă bro lơh geh cồng nha mờ geh bơta niam.

Cau lơh broă geh đo was să jan tàm tŭ lơh broă

Tơnơ̆ tŭ Bộ Quốc phòng ai vaccine rcang sơndră kòp Covid-19, Binh đoàn 15 neh lam lơh cĭt ding dơ̆ 1 ai 100% kuang bàng, cau ling mờ cau lơh broă in. Nàng broă lơh cĭt sơnơm geh bơyai lơh ờdo ờdă, Bình đoàn 15 mờ ală mpồl lơh broă bơt bơtàu broă rơndap lơh, bơyai lam lơh pơlam tàp ai kuang bàng, cau lơh sơnơm lơh kơnòl broă cĭt sơnơm vaccine, kham sac rơwah, jat sền, bơsong bơta gơ aniai tơnơ̆ tŭ cĭt. Kơnờm bơh hơ̆, broă lơh cĭt sơnơm bơh mpồl lơh broă dê geh bơyai lơh niam, jak ngan, ờdo ờdă ngan. Bi Lê Thị Liên, Đội 4, Công ty 72 (kơnhoàl Đức Cơ, càr Gia Lai), Binh đoàn 15 pà gĭt:

Tàm tŭ bơta kòp gơlik geh kal ke bè tŭ do, oh mi công ty bol añ dê kung kơlôi sơnơng ngan sơl. Bè añ là công nhân còr bơsơ̆t kao su bơh công ty 72 dê là mpồl lơh broă tàm ù tiah nhàr lơgar, tiah sar lơgar ngài, geh Bộ Quốc phòng, Binh đoàn, công ty ai tơl bơta ai oh mi bol añ in cĭt vaccine den bol añ chờ hờp ngan, mờ pin dờn ngan. Geh cĭt vaccine rcang sơndră kòp Covid-19 den bol añ kung gơ lơh iang nùs rlau sơl, lơh ngan lơh sir jak ngan tơl kơnòl broă geh jàu.

Ală kuang bàng, cau ling, cau lơh broă geh cĭt sơnơm vaccine rcang sơndră kòp

Tàm 2 nam do, Binh đoàn 15 neh bơt bơtàu gùng dà broă lơh jat jơnau đơs “4 tơn tàm dùl bă tiah” nàng lơh sir jơnau kờñ dơ̆ lĕ bal, lơh jat niam kơnòl broă lơh sa kă bro  pơgồp bal mờ  broă sền gàr dà lơgar, sền gàr bơta lơngap lơngai mơkung rcang sơndră kòp geh cồng nha. Tàm hơ̆, Binh đoàn sền gĭt mblàng yal là broă lơh rcang sơndră kơ̆ kơljap, pơgồp bơnah gàr niam bơta ờdo ờdă ai mpồl lơh broă mờ ală tiah in tềng đap kòp dờng Covid-19. Bơh hơ̆, ală anih lơh broă sa geh gàr niam sùm, ală công nhân, cau lơh broă geh broă lơh mờ priă nhai kơ̆ kơljap. Đại tá Lê Xuân Phương, Phó Tư lệnh Binh đoàn 15 pà gĭt:

Gàr niam rài kis, ngan là priă nhai ai cau lơh broă in là dĭ tŭ ngan mờ khà priă lơh geh kờp bal là bơh 6 tus 7 tơlak đong. Cau công nhân iang nùs ngan. Ngan là, tŭ cau công nhân iang nùs, pin dờn tàm Binh đoàn den hơ̆ sồng broă lơh rcang sơndră kòp là niam ngan. Bol añ ai mpồl lơh sa lơh anih, mpồl cau lơh sa atbồ tơrgùm bal bè dùl mpồl bơtiàn dềt, lơh jat niam ală broă lơh. Tus tŭ do, broă lơh rcang sơndră kòp bơh Binh đoàn dê gàr niam ngan, geh cồng nha mờ ờdo ờdă. Broă lơh sa kă bro nam do bol añ sền gĭt là geh lơh geh mờ sơr lèt mờ broă rơndap lơh bơh Bộ Quốc phòng dê jàu ai Binh đoàn 15 in.

Cau cih Hoàng Qui- Cau mblàng K’Hạnh