VOV4.K’ho- Jơnau pơhìn bơtờp kòp Covid-19 tàm uă tiah tàm càr Bình Dương gơ rềng tus hìu ơm ơpah bơh công nhân cau lơh broă mờ tiah lơh sa mờ măi mok dê. Jơnau tơnggit geh Mpồl đơng lam dà lơgar bè rơcang sơndră kòp Covid-19 đơs tàm dơ̆ pơrjum pờ tơn tàm internet mờ kuang đơng lam bồ càr Bình Dương drim ngai 30/6. Phó Thủ tướng ồng Vũ Đức Đam, Kuang atbồ Mpồl đơng lam neh đơng lam dơ̆ pơrjum.

Yal tàm dơ̆ pơrjum, kờp tus tŭ do, Bình Dương neh geh rlau 300 nă cau bơtờp kòp Covid-19, tàm hơ̆ khà FO geh tàm 32 kong ti, tàm tiah lơh sa mờ măi mok neh geh 39 nă cau F0. Geh 3 tiah geh kòp dờng tàm càr do mờ neh bơtờp tus 10 sơnah ƀòn bơh 3 kơnhoàl mờ ƀòn dờng dê. Tàm pơrjum, Phó Thủ tướng ồng Vũ Đức Đam sồr, Bình Dương pal tơrmù ală broă lơh geh gal cau, tơngkah ală mpồl cau ƀuơn bơtờp kòp; pal tam pà gơs 2 dơ̆ xét nghiệm, sền gròi kòp tàm mpồl bơtiàn mờ ală mpồl cau geh jơnau pơhìn uă, sơlơ tơnguh mpồl cau ai mẫu mờ lơh ngan tàm 24 jơ pal xét nghiệm mờ lơh ngan pal lam lơh jơh bal mờ Realtime PCR mẫu pơgồp.

Cau mblàng K’Duẩn