VOV4.K’ho- Ngai do, 28/7, bơh 6 jiơ mang tus 5 jiơ àng drim gờñ ngai tơnơ̆, làng bol tàm Bình Dương bañ lik lòt tàm gùng nàng rcang sơndră kòp, ờ kờp jơnau sơm kòp kơn jơ̆, lơh broă dà lơgar, halà jat jơnau sồr tam pà bal nàng rcang sơndră kòp Covid-19. Hơ̆ là jơnau sồr bơh Kuang đơng lam bồ càr Bình Dương dê tàm tơngai kòp Covid-19 gam gơlik geh kal ke.

Tŭ do, Bình Dương là dùl tàm ală càr, ƀòn dờng geh khà cau bơtờp kòp Covid-19 gơguh mhar ngan mờ rlau 8 rơbô 900 nă cau, tàm hơ̆ uă ngan cau kòp sền gŏ tàm mpồl bơtiàn. Càr gam lơh jat broă ai ơm yah ngài mpồl bơtiàn jat Chỉ thị sồ 16 bơh Thủ tướng Chính phủ dê. Mơya, bơh broă sền sơwì bơh ală mpồl lơh broă dà lơgar mờ Bộ Y tế, làng bol Bình Dương kung gam sền ờ sơ̆p mờ ờ rcang sền ngăc tàm broă lơh rcang sơndră kòp mờ khà cau lik lòt tàm gùng kung gam uă ngan, ngan là tàm tiah anih tờm ală kơnhoàl, thị xã, ƀòn dờng dê. Tơrmù bơta pơhìn bơtờp kòp uă, ală tiah tàm càr neh lơh uă anih gròi sền cau mờ rơndeh rơndồ lòt rê tàm do; mơkung lòt sền, lơh glài uă cau lơh tìs Chỉ thị sồ 16.

Cau mblàng K’Hạnh