VOV4.K’ho- Mho òr, Tổng Bí thư Nguyễn Phú Trọng neh đơng lam dơ̆ pơrjum Bộ Chính trị nàng pơgồp jơnau đơs bè ờ uă broă lơh nàng dong kờl cau lơh broă mờ cau ngui cau lơh broă gơtìp kal ke tài bơh kòp Covid-19.

Bộ Chính trị đơs, ală dơ̆ gơtìp kòp Covid-19 tàm nam lài mờ nam do geh bơta kal ke, neh lơh aniai uă ngan tus mờ ală broă lơh sa kă bro, broă lơh drơng ala, kuơ màng là tàm ală tiah lơh sa mờ măi mŏk, tiah lơh broă sa. Đơs tàm dơ̆ pơn dŭt pơrjum, Tổng Bí thư Nguyễn Phú Trọng pà gĭt, Bộ Chính trị ring bal mờ gùng dà broă lơh pơn jăt tai ai geh broă dong kờl cau lơh broă mờ cau ngui cau lơh broă gơtìp kal ke tài bơh kòp Covid-19. Đơs tờm, pal sền wơl broă mờng chài, broă dong kờl bơh ală lơgar tàm dunia nàng tơrgùm sền wơl, ai gŏ di cau kờñ dong kờl mùl màl, bơ̆t bơtàu khà dong kờl di pal, nền nòn, ndrờm bal, loh làng, geh cồng nha. Tổng Bí thư Nguyễn Phú Trọng sồr tơnkah kòp gam gơtìp kal ke, den tàng bañ sền ờ sơ̆p, ờ sền gròi tàm broă sơndră mờ kòp gơtờp.

Cau mblàng Ndong Brawl