VOV4.K’ho - Drim òr (09/04), tàm hìu lơh broă Đảng dà lơgar, Bộ Chính trị neh pơrjum tềng đăp mờ broă đơng lam bơh Tổng Bí thư ồng Nguyễn Phú Trọng nàng cri bơyai bè ờ uă bơta bal mờ cồng nha đơng lam, lam sồr broă lơh quý 1 nam 2021 mờ ờ uă kơnòl tờm tus do.

Bộ Chính trị ring bal jơnau, Ban Chấp hành Đảng dà lơgar, Bộ Chính trị, ban Bí thư, Quốc hội, Chủ tịch lơgar, Chính phủ, ală cấp, ală gah lơh broă dà lơgar neh đơng lam, lam sồr, đơng lam geh cồng nha, bơyai lơh geh cồng nha niam bơnĕ pơrjum dờng dơ̆ 13 Đảng dê mờ lơh gơs niam bơnĕ kơnòl kuơ màng bè bơ̆t bơtàu Đảng mờ mpồl chính trị, tơnguh bơtàu broă lơh sa mpồl bơtiàn, sền gàr bơta lơngăp lơngai dà lơgar, broă lơh bal mờ lơgar ndai.

Tàm tơngai tus, ală cấp, ală gah lơh broă pal pơn jăt tai tơnguh ală cồng nha neh lơh geh, gờñ tơmù ală broă ờ pràn, bơta kal ke, bơta tơlòng; pơn jăt tai đơng lam lơh jăt Nghị quyết pơrjum dờng dơ̆ 13 Đảng dê mờ lơh ngan lơh gơs niam ală jơnau kờñ, kơnòl broă geh ai tàm nam 2021. Tàm hơ̆ pal tơrgùm đơng lam geh cồng nha dơ̆ tĕ khà kuang bàng Quốc hội khoă 15 mờ HĐND ală cấp tơngai bơh nam 2021 tus 2026.

Cau mblàng Ndong Brawl