VOV4.K’ho - Tŭ do gùt lơgar geh 26 rơbô nă kơnòm bơsram tàm 42 càr, ƀòn dờng ờ hềt pơrlòng jơh bơsram cấp 3. Do là ală cau gơtìp F0, F1, F2 ha là gam kis tàm ală tiah gơtìp tam cah is, wàng se kơrian tài gơtìp bơh kòp Covid-19. Bộ Giáo dục mờ Đào tạo (GD-ĐT) pa geh sră nggal pơyoa tus UBND ală càr, ƀòn dờng in bè broă bơyai lơh pơrlòng jơh bơsram cấp 3 dơ̆ 2.

Jăt mờ hơ̆, dơ̆ 2 bơh pơrlòng jơh bơsram cấp 3 nam 2021 geh bơyai lơh tàm ală ngai 6 mờ 7 nhai 8 ai ală kơnòm bơsram ờ hềt tus pơrlòng ha là ờ hềt lơh gơs jơnau pơrlòng dơ̆ sơnrờp pa do. Cau ai tơngĭt jơnau đơs Việt Nam lùp Thứ trưởng Bộ GD-ĐT ồng Nguyễn Hữu Độ bè tơngu me do.

                                                  Thứ trưởng Bộ GD-ĐT ồng Nguyễn Hữu Độ

-Ơ Thứ trưởng Nguyễn Hữu Độ! Tềng đăp mờ bơta kòp gơtờp ngai sơlơ kal ke, dan ồng pà gĭt Bộ GD-ĐT geh broă lơh lơi nàng gàr niam gơnoar kuơ ai ală kơnòm pơrlòng ờ hềt tus pơrlòng jơh bơsram cấp 3 dơ̆ sơnrờp in?

Thứ trưởng Nguyễn Hữu Độ: Gơtùi đơs tàm bơta kòp gơtờp gơtìp kal ke ngan mờ gơtờp bè tŭ do, khà cau gơtìp kòp gơguh tus gĭt nđờ rơbô nă tàm dùl ngai, Bộ GD-ĐT gŏ là broă bơyai lơh pơrlòng dơ̆ 2 là dùl broă lơh gơtìp kal ke ngan. Mơya, tàm dơ̆ sơnrờp neh geh bơyai lơh mờ rơlao 96% khà kơnòm pơrlòng tus pơrlòng, khà kơnòm pơrlòng gam tai tus pơrlòng dơ̆ 2 jăt jơnau yal bơh ală càr, ƀòn dờng là di pơgăp rơlao 26 rơbô 254 nă kơnòm pơrlòng tàm 42 càr, ƀòn dờng. Mờ bơta bè do, den khà kơnòm dan cih măt pơrlòng dơ̆ 2. Bộ GD-ĐT geh bơyai lơh pơrlòng dơ̆ 2 mờ bơta pal gàr niam ờ do ờ dă mờ ai jơh ală kơnòm pơrlòng in mờ ờ geh tus bal pơrlòng dơ̆ sơnrờp tài geh ală tơngu me (mìng ờ kờp geh jơnau pơrlồm den geh bơyai lơh pơrlòng dơ̆ 2).

-Bè hơ̆, rơndăp broă pơrlòng jơh bơsram cấp 3 dơ̆ 2 geh bơyai lơh bè lơi ơ ồng?

Thứ trưởng Nguyễn Hữu Độ:Bè rơndăp broă bơyai pơrlòng dơ̆ 2 den Bộ GD-ĐT neh rơcang pơrjum mờ 42 càr, ƀòn dờng mờ neh ring bal mờ UBND ală càr, ƀòn dờng pơrlòng tàm ngai 5, 6, 7 nhai 8 mờ jăt mờ hơ̆ ală Sở neh geh jơnau yal mờ UBND ală càr mờ tŭ do Bộ GD-ĐT neh dờp geh ờ uă jơnau yal bơh Chủ tịch UBND ală càr, ƀòn dờng geh kòp gơtờp nàng dan pơrlòng tàm ngai 5, 6, 7. Den tàng, Bộ GD-ĐT neh geh jơnau yal ring bal broă bơyai lơh pơrlòng jơh bơsram cấp 3 dơ̆ 2 tàm ngai 5, 6, 7 nhai 8 nam 2021 mờ jăt mờ hơ̆, kung gam sồr mờ ală càr, ƀòn dờng lơh ală broă gơrềng bal tus mờ kỹ thuật.

Mùl màl là pal geh khà măt mùl màl bơh tơl nă kơnòm pơrlòng mờ geh broă bè broă tam gơl bè mpồl duh broă pơrlòng. Bè geh uă ngan càr mìng geh 1, 2 nă kơnòm pơrlòng tàm dơ̆ 2, geh càr den 100 nă den gơtùi pơyoa tus ală càr rềp bal ndai nàng tơmù mpồl duh broă pơrlòng di pal. Ală kơnòm bơsram kờñ bè hơ̆, tàm tơngu me ring bal bơh bàr mpồl duh broă pơrlòng den Bộ GD-ĐT geh ring bal mờ geh ai phần mềm nàng lơh sồ báo danh, anih pơrlòng nàng ală kơnòm bơsram gơtùi tus pơrlòng niam ngan. Tŭ do, Bộ neh mùl màl geh jơnau dan mờ ală càr, ƀòn dờng yal bè gùng dà broă lơh pơrlòng bơh ală càr, ƀòmn dờng dê nàng gàr niam ờ do ờ dă bè kòp gơtờp mờ kung là gàr niam ờ do ờ dă broă bơyai lơh pơrlòng.

-Gơwèt mờ ală càr, ƀòn dờng geh kòp gơtờp kal ke ngan, khà cau kòp gơguh gĭt nđờ rơhiang nă, geh tŭ gĭt nđờ rơbô nă pah ngai den Bộ geh gùng dà broă lơh bè lơi?

Thứ trưởng Nguyễn Hữu Độ: Mờ ală càr, ƀòn dờng mờ kòp gơtìp kal ke ngan den Bộ gam geh broă lơh jăt là bơta pràn kơl dang să jan ală kơnòm bơsram là rơlao jơh, den tàng mìng geh bơyai lơh tŭ ală bơta mùl màl ờ do ờ dă. Bộ Y tế den neh geh jơnau bơto sồr bơyai lơh tàm bơta niam, geh bal broă geh kơnòm pơrlòng là F1, F2 nàng gàr niam ờ do ờ dă. Bŭ lah bè hơ̆, nàng gàr niam ờ do ờ dă tàm bơta kòp gơtờp đơs bal bè hơ̆, gơtờp uă tàm mpồl bơtiàn bè hơ̆, jòi ờ gŏ tềl F0 den gơtìp kal ke ngan. Den tàng mờ ală tiah lơi ờ gơtùi bơyai lơh tài geh bơta mùl màl den gơtùi dan mờ Bộ geh gùng dà broă lơh dong kờl ai ală kơnòm bơsram in.

Di gơlan geh lơh jăt gùng dà sền nàng ai ală kơnòm bơsram do in geh khà jơh bơsram cấp 3. Tài mờ bơta bè do den geh ờ uă càr dan là ai geh bơyai lơh pơrlòng dơ̆ 3. Mơya mùl màl là bơyai lơh pơrlòng dơ̆ 3 tàm bơta kòp gơtờp kal ke ngan den broă bơyai lơh pơrlòng kung kal ke sơl. Den tàng Bộ kung gam kơlôi sơnơng di gơlan geh sền wơl mờ ală càr, ƀòn dờng gơtìp bè hơ̆ den gơtùi sền nàng ai khà neh jơh bơsram kơnòm bơsram in mờ geh gùng dà nàng dong kờl ală kơnòm bơsram tàm broă pơrlòng mŭt bơsram đại học di pal mờ jơnau kờñ tŭ do dê.

-Ơi, dan ưn ngài Thứ trưởng!

Cau mblàng Ndong Ndong Brawl