VOV4.K’ho- Tàm tơngai tus, bơta gơbàn bơh kòp Covid-19 dê pơn jăt tai ngai sơlơ gơbàn kal ke bal mờ uă jơi tam gơl să pa, Bộ Kế hoạch mờ Đầu tư yal lài kung gam sơl uă bơta pơhìn mờ bơta lòng gơwèt mờ mpồl lơh sa kă bro mờ sồr geh 8 mpồl broă lơh, lơh gơlik bơta pràn kis wơl ai mpồl lơh sa kă bro in.

Tàm hơ̆, tơrgùm lam lơh jăt nùs nhơm “tam dră mờ kòp bè tam dră mờ bol sò tơm sơl”, ală kấp, ală gah, ală tiah pal tơrgùm mŭt lơh bal bal mờ bơta lơh ngan uă ngan rlau jơh, ai lài jơh ală bơta pràn nàng gròi sền niam bơta gơbàn bơh kòp Covid-19 dê, ai tơl bơta ƀươn ai mpồl lơh sa kă bro in kơ̆ kơl jăp broă lơh sa kă bro, bơtàu tơnguh wơl mờ bơtàu tơnguh. Jăt mờ hơ̆, lơh jăt ală broă lơh, rơcăng sơndră kòp Covid-19 ngac ngar, geh cồng nha mơkung ai tơl ală bơta niam ai mpồl lơh sa kă bro in kơ̆ kơl jăp mờ gàr sùm broă lơh sa kă bro; sền gàr jun pơndiang phan bơna niam, geh cồng nha; dong kờl koh tơrmù priă tă, tă bơsong kal ke bè priă jền ai mpồl lơh sa kă bro in...Bal mờ hơ̆, Bộ trưởng Bộ Kế hoạch mờ Đầu tư ồng Nguyễn Chí Dũng pà gĭt, Thủ tướng Chính phủ geh gờñ crơng gơs Mpồl lơh broă dờng màng bơh Thủ tướng Chính phủ dê bè tă bơsong kal ke ai mpồl lơh sa kă bro mờ làng bol gơtìp gơrềng tài bơh kòp dờng Covid-19 in.

 Cau mblàng Lơ Mu K’Yến