VOV4.K’ho- Cục kảnh sát atbồ sră nggal bè rơndap tap sèng mpồl bơtiàn, Bộ Kuang àng neh bơyai lơh dơ̆ yal ngan ngồn lam lơh phần mền atbồ làng bol tiah kòp gùt lơgar jat tàm bơnàng jă cơ sở dữ liệu dà lơgar bè làng bol ơm kis. Jat hơ̆, Cục Kảnh sát atbồ sră nggal bè rơndap tap sèng mpồl bơtiàn neh lam lơh tơrlòng lài phần mềm atbồ làng bol tiah kòp tàm ƀòn dờng Hà Nội mờ càr Quảng Ninh jat tàm bơnàng jă tàm tơrbŏ bal mờ Anih cơ sở dữ liệu dà lơgar bè làng bol ơm kis. Neh lơh sir phần mềm nàng drơng broă làng bol in yal geh bơta buơn boài, sền gàr bơta ndơ̆p ndơr jơnau yal, drơng broă geh cồng nha broă lơh rcang sơndră kòp Covid-19 tàm tơngai bè tŭ do.

Trung tá ồng Nguyễn Thành Vĩnh, Phó  Kuang atbồ Anih tờm dữ liệu dà lơgar bè làng bol ơm kis pà gĭt, bơh phần mền atbồ làng bol tiah kòp, làng bol tŭ ngui geh di tŭ yal tơngĭt jơnau yal di pal ngan bè bơta kòp tiah làng bol dê ơm kis, lơh broă, di tŭ lơh jat ală broă lơh rcang sơndră lài. Rcang lài yal lài jơnau yal, lơh geh mã QR code nàng sền sơ wì tŭ lòt gan anih gròi sền kòp, ờ roh tŭ jiơ yal tàm sră pơ àr cih mờ tê, tơr mù bơta gơ kòl gùng; mpồl lơh broă geh gơnoar bơh phần mềm do geh di tŭ tơrgùm jơh ală bơta, atbồ làng bol tiah kòp nàng cribơyai bal đơng lam broă rcang sơndră kòp Covid-19.

Cau mblàng K’Hạnh