VOV4.K’ho- Drim ngai 21/6, Đảng ủy Kuang àng dà lơgar, Bộ Kuang àng bơyai lơh Pơrjum sền wơl broă lơh Kuang àng 6 nhai bồ nam 2021. Jơnau yal tàm pơrjum đơs loh, bơh bồ nam tus tŭ do, mpồl kuang àng làng bol neh lơh ngan tơrgùm lơh jat jơh nùs ală broă lơh, broă rơndap lơh, broă lam lơh neh ai tơlik nàng kờñ lam lơh geh cồng nha jơnau kờñ bơh nam 2021 dê.

Đơs tàm pơrjum, Chủ tịch lơgar ồng Nguyễn Xuân Phúc đơs nền “Tàm tơngai gơlik geh kal ke bơh kòp bơtờp dê, bơta lơh aniai uă ngan bơh ală mpồl pơrlơ̆ dră dê, Bộ Kuang àng neh lơh ngan, cribơyai jơh nùs mờ ală mpồl bè ling klàng, ală kấp ủy gơnoar atbồ kấp hơ đơm, mặt trận dà lơgar.. nàng tơrgùm hòi jà ală mpồl lơh broă, lam lơh ală rơndap broă sền gàr ờdo ờdă ală broă dờng bơh dà lơgar dê. Pơn rơ bè Pơrjum dờng Đảng dơ̆ 13, tĕ khà Quốc hội, tĕ khà Hội đồng Nhân dân ală kấp.. lơh gơs geh cồng nha ală jơnau kờñ, kơnòl broă ai tơlik.

Cau mblàng K’Duẩn