VOV4.K’ho - Ngai òr 5/3, tàm Hà Nội, Bộ Kuang àng bơyai lơh pơrjum tơn jơh broă lơh sền gàr ngap lơngai, ờ do ờ dă Pơrjum Kuang bàng dờng màng Mỹ-Triều Tiên dơ\ 2 mờ dơ\ tus còp lơgar Việt Nam bơh Kuang atbồ lơgar Triều Tiên, ồng Kim Jong-un dê.

Bộ trưởng kuang àng, ồng Tô Lâm đơs tờm, sền gàr geh cồng nha ngap lơngai Pơrjum Kuang bàng dờng màng Mỹ - Triều Tiên, tàm tu\ tơngai lơyah, gah do neh lam sồr, bơyai lơh, rơndap ai mpồl cau lơh broă; broă lơh đơng lam, cribơyai, dong kờl, gàr jơnau yal tơnggit; broă bơt bơtàu mờ lơh jat rơndap broă neh ai go\ bơta tơr gùm, ring bal, jak chài, dipal, geh cồng nha, geh uă jơnau bơceh pa.

Bộ trưởng sồr tơnơ\ pơrjum do, Kuang àng ală mpồl, ală tiah mhar tơn jơh, sền sơwì, pơn jat tai sền sơwì ală mpồl cau, cau dùl nă să geh cồng nha jak nàng sồr pà khà jờng; mơkung sơlơ lơh pràn broă bơsram mờ lơh jat 6 jơnau mờ Bác Hồ bơto sồr Kuang àng làng bol in, pơgồp bơnah bơt bơtàu Mpồl Kuang àng ngan ngồn sàng kloh, pràn kơldang, kơ\ kơljap, ngai sơlơ bơtàu tơnguh.