VOV4.K’ho - Mho mờ mang òr (12/07), tàm Hà Nội, Đại tướng Tô Lâm, Bộ trưởng Bộ Kuang àng neh cri bơyai pờ tơlĭk tàm internet mờ ồng Ajit Kumar Doval, Kuang dong pơlam broă sền gàr bơta lơngăp lơngai lơgar Ấn Độ.

Tàm dơ̆ cri bơyai bàr gah kơ̆p kờñ pơn jăt tai chồl pràn lơh broă bal tam gơl jơnau tơngĭt, jun jơnau yal bơh kuang bàng đơng lam dờng, pơgồp bal, dong kờl bal tàm ală pơrjum dunia kung bè tàm broă bơsong ală broă geh sền gròi bal. Đơs tàm dơ̆ cri bơyai, Kuang dong pơlam broă sền gàr bơta lơngăp lơngai lơgar Ấn Độ ồng Ajit Kumar Doval đơs, Mpồl duh broă sền gàr bơta lơngăp lơngai dà lơgar Ấn Độ sùm sền kuơ mờ lơh geh sùm, tơnguh bơtàu broă tam klăc bal, gĭt gơ̆p bal ờs mờng kuơ màng bơh bàr lơgar, tŭ lơi kung rơcang tơnguh, pờ ơnàng lơh broă bal mờ Bộ Kuang àng lơgar Việt Nam tàm ală gah broă.

Bàr gah pơn jăt tai bơyai lơh geh cồng nha broă cri bơyai sền gàr bơta lơngăp lơngai cấp Thứ trưởng đah bàr lơgar dơ̆ bàr tàm lơgar Ấn Độ; tơnguh broă rơcang sơndră mờ sò tơm iơh bơsăk, cau tìs gan dà lơgar, cau tìs ngui công nghệ cao, kơñao priă jền, cau tìs bè ma túy; chồl pràn lơh broă bal tàm broă bơto bơtê, tàp kuang bàng geh công nghệ thông tin, khoa học hình sự.

Cau mblàng Ndong Brawl